წლის ბოლო მატჩებში ჩელსი და მანჩესტერი დამარცხდნენ

ინგლისის პრემიერ ლიგის მე-19 ტურში იფსვიჩმა საკუთარ მოედანზე ჩელსი მიიღო.

შეხვედრაში ანგარიში მე-12 წუთზე მასპინძლებმა გახსნეს ლაიამ დელაპის პენალტით. 24-ე წუთზე ჟოაო ფელიქსის გოლი თამაშგარე მდგომარეობის გამო არ ჩაითვალა და პირველი ტაიმი იფსვიჩმა 1-0 მოიგო.

მეორე ტაიმიც სწრაფი გოლით გაიხსნა. 53-ე წუთზე ომარი ჰათჩინსონმა სხვაობა ორამდე გაზარდა. მატჩის დარჩენილ ნაწილში ჩელსიმ თამაშში დაბრუნება ვეღარ მოახერხა და იფსვიჩმა სენსაციურად 2-0 იმარჯვა.

ლონდონელები 19 მატჩის შემდეგ 35 ქულით მე-4 ადგილზე არიან, იფსვიჩმა კი ამ სეზონში მე-3 გამარჯვება მოიპოვა და 15 ქულით მე-18 ადგილზე გადაინაცვლა.

პარალელურად ოლდ ტრაფორდზე მანჩესტერ იუნაიტედი ნიუკასლს დაუპირისპირდა. ამ მატჩშიც იგივე ანგარიში დაფიქსირდა, თუმცა ამჯერად სტუმართა სასარგებლოდ.

ორივე გოლი პირველ ტაიმში გავიდა. მე-4 წუთზე ალექსანდერ ისაკმა ანგარიში გახსნა, მე-19 წუთზე კი ჟოელინტონმა გაზარდა სხვაობა ორ ბურთამდე.

რუბენ ამორიმმა ცვლილება პირველივე ტაიმში გააკეთა და ჯოშუა ზირკზეს მაგივრად კობი მეინო შემოიყვანა, თუმცა მასპინძლებმა თამაშის სცენარი ვერ შეცვალეს და ყველა ტურნირზე ზედიზედ მეოთხედ დამარცხდნენ, ნიუკასლმა კი ზედიზედ მე-5 გამარჯვება მოიპოვა.

ნიუკასლი 19 მატჩის შემდეგ 32 ქულით მე-5 ადგილზეა, კაჭკაჭები ჩელსის 3 ქულით ჩამორჩებიან, სიტის კი 1 ქულით უსწრებენ.

იუნაიტედი კი 22 ქულით მე-14 ადგილზეა და გასავარდნ ზონას 7 ქულით უსწრებს.