„თუნდაც ცალ ფეხზე ან ხოხვით“ — რობერტო კარლოსი რონალდუზე

რეალისა და ბრაზილიის ნაკრების ყოფილმა მცველმა, რობერტო კარლოსმა, განაცხადა, რომ არ სურს კრიშტიანუ რონალდუმ კარიერა დაასრულოს.

– როგორ აფასებთ 41 წლის კრიშტიანუ რონალდუს ყოფნას მსოფლიო ჩემპიონატზე?

„კრიშტიანუ არასოდეს უნდა გაჩერდეს. არასოდეს. თუ ოდესმე კარიერის დასრულებას გადაწყვეტს, დავურეკავ და ვეტყვი, რომ არ გაჩერდეს (იცინის).

ის ერთ-ერთია იმ მოთამაშეთაგან, რომლებიც ძალიან ბევრს ნიშნავენ — კლუბებისთვის, ნაკრებისთვის, ბავშვებისთვის და ახალგაზრდა ფეხბურთელებისთვის. მან ფეხბურთის თამაში არ უნდა შეწყვიტოს — თუნდაც ცალ ფეხზე ან ხოხვით. ის უდიდეს ძალასა და ენერგიას აძლევს ნებისმიერ ბიჭუნას, რომელსაც თამაშის დაწყება სურს“.

– შეძლებს ის მე-1000 გოლის გატანას მსოფლიო ჩემპიონატზე?

„მათთვის, ვისაც კრიშტიანუ და ფეხბურთი უყვარს, იმის ნახვა, თუ როგორ აგრძელებს ის ისტორიის წერას და რეკორდების დამყარებას, შესანიშნავია. ერთადერთი მოთამაშე, რომელმაც 1000 გოლი გაიტანა, პელეა, მაგრამ კრიშტიანუსაც შეუძლია ამ სიაში შესვლა.

ვხედავ, რომ ის ბედნიერი და თავდაჯერებულია საუდის არაბეთის ჩემპიონატში. აბსოლუტურად დარწმუნებული ვარ, რომ ის ამ ნიშნულს მიაღწევს. ის პრაქტიკულად არ იღებს ტრავმებს, აგრძელებს კარგ თამაშს და სხვებისთვის ორიენტირად რჩება — პორტუგალიას შეუძლია ამით იამაყოს“, — განაცხადა კარლოსმა.