უეინ რუნიმ არსენალს ურჩია, რომ მანჩესტერ სიტის დასამარცხებლად „ბინძურად ითამაშონ“. მანჩესტერ იუნაიტედის ყოფილი ვარსკვლავის ამ სიტყვებმა დიდი კამათი გამოიწვია, თუმცა თავად რუნი მიიჩნევს, რომ საბოლოო შედეგი გაცილებით მნიშვნელოვანია, ვიდრე ფანების რეაქცია.
არსენალი ცხრილს 70 ქულით ლიდერობს, სიტის კი 61 ქულა და ერთი გამოტოვებული მატჩი აქვს. თუ კვირას, 19 აპრილს, მეთოფეები ეტიჰადზე მოიგებენ, ისინი კომფორტულად მიუახლოვდებიან პრემიერ ლიგის ტიტულს.
რუნიმ აღნიშნა, რომ სიტის ფსიქოლოგიური უპირატესობა აქვს, რადგან მათმა მწვრთნელმა და ფეხბურთელებმა ზუსტად იციან, როგორ შეინარჩუნონ სიმშვიდე ასეთ მომენტებში. მისი თქმით, არსენალის მოთამაშეები შესაძლოა ანერვიულდნენ, ნეგატიური განწყობა კი თამაშზე ცუდად მოქმედებს.
სწორედ ამიტომ, რუნი მიიჩნევს, რომ მიკელ არტეტას გუნდმა ჩვეულზე მეტი უნდა აჩვენოს. „ბინძურ თამაშში“ ის თაღლითობას კი არა, არამედ მეტოქის რიტმის არევას, თამაშის ტემპის კონტროლს და მაქსიმალურ ფიზიკურ აგრესიას გულისხმობს.
„ფანებს მოეწონებათ ეს ფეხბურთი თუ არა, არსენალმა ყველაფერი უნდა გააკეთოს, რომ სიტის მოგების საშუალება არ მისცეს. მათ უნდა გამოიჩინონ გამძლეობა და ნებისმიერი გზით გააჩერონ მეტოქე,“ - დაამატა რუნიმ.
