VIDEO: კარიერაში მე-2 დიდი სლემი - რიბაკინამ საბალენკა დაამარცხა

მელბურნში ავსტრალიის ღია პირველობის ქალთა ფინალური დაპირისპირება გაიმართა.

გადამწყვეტ მატჩში ერთმანეთს მსოფლიო რეიტინგის ლიდერი არინა საბალენკა და მე-5 ნომერი ელენა რიბაკინა დაუპირისპირდნენ. ფინალური შეხვედრა 2 საათი და 19 წუთი გაგრძელდა და ყაზახეთის წარმომადგენლის გამარჯვებით 3 სეტში დასრულდა (4-6, 6-4, 4-6).

ელენა გადამწყვეტ სეტს 0-3 აგებდა, თუმცა თამაშში დაბრუნება შეძლო და საბოლოოდ საჩემპიონო სეტი მოიგო კიდეც.

რიბაკინამ 2023 წლის ავსტრალიის ღია პირველობის ფინალში საბალენკასთან მარცხისთვის რევანში აიღო და აღნიშნული ტიტული კარიერაში პირველად მოიპოვა, ჯამში კი ეს მისთვის დიდი სლემის მე-2 ტიტულია. ელენამ 2022 წელს უიმბლდონის მოგება შეძლო.

ყაზახმა სპორტსმენმა რეიტინგის ტოპ 10 ჩოგბურთელთან ზედიზედ მე-10 მატჩში მოიპოვა გამარჯვება, ჯამში კი ბოლო 21 შეხვედრიდან 20 მოიგო, ავსტრალიაში კი ტურნირის განმავლობაში მხოლოდ 1 სეტი დათმო და ისიც ფინალში.

ელენა რიბაკინამ ჩემპიონობის გზაზე იუვანი, გრაჩევა, ვალენტოვა, მერტენსი, შვიონტეკი, პეგულა და საბალენკა დაამარცხა.

ავსტრალიის ღია პირველობის შემდეგ, ელენა რიბაკინა მსოფლიო რეიტინგში მე-3 ადგილზე გადაინაცვლებს, მასზე წინ მხოლოდ არინა საბალენკა და იგა შვიონტეკი იქნებიან.

მელბურნში კაცთა ფინალი ხვალ გაიმართება, სადაც ერთმანეთს კარლოს ალკარასი და ნოვაკ ჯოკოვიჩი დაუპირისპირდებიან.