გიორგი ქოჩორაშვილმა სპორტინგის ძირითად შემადგენლობაში 13 დეკემბრის შემდეგ პირველად ითამაშა.
მისმა გუნდმა პორტუგალიის თასის 1/4 ფინალში ავეში დამატებით დროში დაამარცხა (3:2) და შემდეგ ეტაპზე გავიდა. ქოჩორას პირველი ტაიმის ბოლო წუთზე გოლის გატანა შეეძლო - ახლო მანძილიდან დარტყმული ბურთი ხარიხას გაარტყა. მოედანი 68-ე წუთზე დატოვა, როცა ლისაბონელები 2:1-ს იგებდნენ.
აღსანიშნავია, რომ ქოჩორამ გუშინდელამდე სასტარტოდან ბოლო მატჩი ისევ ავეშის წინააღმდეგ, ჩემპიონატში დაიწყო - 13 დეკემბერს, მისმა გუნდმა მეტოქე 6:0 გაანადგურა, გიომ კი ასისტი მიითვალა.
ქოჩორაშვილმა მიმდინარე საკლუბო სეზონში ძირითადიდან მე-8 თამაში დაიწყო, ჯამში კი 22-ე შეხვედრა ჩაატარა - აქტივში 2 საგოლე პასი აქვს.
სპორტინგი თასის 1/2 ფინალში, რომელიც უკვე 2-მატჩიანია, პორტუს დაუპირისპირდება, მეორე ნახევარფინალში კი მე-2 ლიგის წარმომადგენელი ტორენსე და მე-3 ლიგის კლუბი ფაფე ხვდებიან.
