VIDEO: ქართული დერბი საფრანგეთში - თავი ორივემ გამოიჩინა, გამარჯვება კვარას დარჩა

საფრანგეთის ლიგა 1-ს 27-ე ტურში პსჟ-მ სტუმრად სენტ-ეტიენი გაანადგურა.

შეხვედრა პარიზული გუნდის გამარჯვებით 6:1 დასრულდა. 

ხვიჩა კვარაცხელიამ და ზურიკო დავითაშვილმა თამაში სასტარტო შემადგენლობაში დაიწყეს და თავის გამოჩენა ორივემ შეძლო - მე-9 წუთზე დავითაშვილმა თანაგუნდელს გაატანინა და ანგარიში სენტ-ეტიენმა გახსნა, კვარამ კი 50-ზე მცველის პასი ჩაჭრა და შეტევა თავადვე ლამაზი გოლით დაასრულა, რამაც პსჟ იმ მომენტისთვის წინ გაიყვანა.

ზურიკოს ასისტი: 

კვარას გარდა პსჟ-ს რიგებში თავის გამოჩენა გონსალო რამოშმა (პენალტით), დეზირე დუემ (2), ჟოაო ნევეშმა და მბაიემ მოახერხეს. 

კვარას გოლი: 

დავითაშვილმა მოედანზე 63 წუთი გაატარა, კვარამ კი - 64, რის შემდეგაც ადგილი უსმან დემბელეს დაუთმო, როცა ანგარიში უკვე 4:1 იყო.

პსჟ-მ 71 ქულა დააგროვა და იმ შემთხვევაში, თუ დღეს მოგვიანებით მონაკო - ნიცას მატჩი ფრედ დასრულდება, საფრანგეთის ჩემპიონი ნაადრევად, ოფიციალურად გახდება. 

სენტ-ეტიენი კი 20 ქულით ბოლოსწინა ადგილს იკავებს და გადამრჩენელ მე-15 პოზიციამდე 5 ქულა აშორებს.