VIDEO: რაფინიას სრულყოფილი ჰეთ-თრიქი - ქოჩორას სევილიამ ბარსასთან წააგო

რაფინია ბოლო 11 წლის განმავლობაში ბარსელონას პირველი ფეხბურთელი გახდა, რომელმაც ლა ლიგაში „სრულყოფილი ჰეთ-თრიქი“ შეასრულა.

ბრაზილიელის სამმა გოლმა და ლამინ იამალის ორმა საგოლე გადაცემამ კატალონიელებს რამონ სანჩეს პისხუანზე სევილიასთან მატჩის შემოტრიალებასა და 3:1 გამარჯვებაში დაეხმარა.

სანტანდერის რასინგთამ შთამბეჭდავ 7:2 გამარჯვებაში სამ გოლში მონაწილეობის შემდეგ, თავდაჯერებული იამალი მატჩის დასაწყისშივე ძალიან ახლოს იყო ანგარიშის გახსნასთან, თუმცა მისი შორეული დარტყმა ძელს მოხვდა.

დაახლოებით 10 წუთის შემდეგ სევილიამ აჩვენა, რატომ ითვლებოდა ეს შეხვედრა მიმდინარე სეზონში ბარსელონასთვის ყველაზე სერიოზულ გამოცდად.

ფელიქს კორეიას ჩაწოდების შემდეგ იუსუფ ფოფანამ ახლო ძელთან თავით ძლიერად დაარტყა და ლა ლიგაში სადებიუტო მატჩის ჩამტარებელ დომინიკ ლივაკოვიჩს შანსი არ დაუტოვა.

მასპინძლების გულშემატკივრები ფოფანას სევილიას მაისურით პირველ გოლს ჯერ კიდევ ზეიმობდნენ, თუმცა გასული სეზონის მსგავსად ბარსელონასთან შინ 4:1 გამარჯვების იმედი მალევე გაუქრათ, ანგარიში რაფინიამ გაათანაბრა.

ბრაზილიელი ამ სეზონში ცენტრალური თავდამსხმელის ახალ როლში შესანიშნავად გამოიყურება. მან ანდრეას კრისტენსენის გამჭოლი გადაცემის შემდეგ ჭკვიანური მოძრაობით მცველების ზურგს უკან შეაღწია, ბურთი მარჯვენა ფეხზე გადაიტანა და მეკარეს მშვიდად გაუტანა.

ამ გოლით რაფინიამ ლა ლიგის მხოლოდ 7 შეხვედრაში უკვე 10-გოლიან ნიშნულს მიაღწია.

პირველი ტაიმი ფრედ დასრულდა, ხოლო მეორე ნახევარი იამალმა განსაკუთრებული მოტივაციით დაიწყო, სევილიას გულშემატკივრები მას პირველ ტაიმში გაფუჭებული მომენტის გამო დასცინოდნენ.

საბოლოოდ, 19 წლის ფეხბურთელს ბოლო სიტყვა დარჩა და ჰანსი ფლიკის გუნდის დაწინაურებაში გადამწყვეტი როლი შეასრულა.

იამალმა ჰაერიდან ბურთი შესანიშნავად მიიღო, სევილიას ორი მცველის ზეწოლას თავი დააღწია და საჯარიმოში ჩააწოდა, სადაც რაფინიამ თავური დარტყმით თავისი მეორე გოლი გაიტანა.

სულ რამდენიმე წუთში ბარსელონას კაპიტანი ჰეთ-თრიქთან ძალიან ახლოს იყო, კუთხურიდან პირდაპირ კარში ჩაახვია, თუმცა ბურთი შორეულ ძელს მოხვდა.

70-ე წუთამდე ცოტა ხნით ადრე რაფინიამ ზედიზედ მეორე მატჩში ჰეთ-თრიქი მაინც შეასრულა. იამალის იდეალურად გათვლილი გამჭოლი გადაცემის შემდეგ ბრაზილიელმა მარცხენა ფეხით ბურთი წინ გამოსულ ოდისეას ვლახოდიმოსს თავზე ოსტატურად გადაუგდო.

29 წლის ფეხბურთელის მიერ მიმდინარე სეზონში ყველა ტურნირზე გატანილმა მე-14 გოლმა ბარსელონას ლა ლიგაში ზედიზედ მე-7 გამარჯვება გაუფორმა.

კატალონიელებმა ასევე მარტივად აიცილეს თავიდან სევილიასთან სტუმრად ზედიზედ მე-2 მარცხი, რაც ბოლოს 2007 წელს დაემართათ.

გამარჯვების შედეგად ბარსელონამ სატურნირო ცხრილის სათავეში უპირატესობა 6 ქულამდე გაზარდა.

რაც შეეხება სევილიას, მათთვის მცირე ნუგეში ის არის, რომ ბილბაოში დღეს დაფიქსირებული ფრის შედეგად გუნდი სანაკრებო პაუზას სატურნირო ცხრილის მე-5 ადგილზე აუცილებლად შეხვდება.

მასპინძელთა სასტარტო შემადგენლობაში იყო გიორგი ქოჩორაშვილი, რომელმაც მოედანზე 68 წუთი გაატარა, რომელმაც Sofascore-სგან 6.7 შეფასება დაიმსახურა.