ვიდეო: სანაბრიას მაკრატელა - პარაგვაიმ არგენტინა დაამარცხა

სამხრეთ ამერიკაში მსოფლიო ჩემპიონატის საკვალიფიკაციო ეტაპის მე-11 ტურში პარაგვაის ნაკრებმა ასუნსიონში მსოფლიო ჩემპიონი არგენტინა მიიღო.

მატჩში ანგარიში მე-11 წუთზე გაიხსნა. ენცო ფერნანდესის პასის შემდეგ თავისი მომენტი ლაუტარო მარტინესმა გამოიყენა და სტუმრები წინ გაიყვანა.

მასპინძლებმა წონასწორობა მალევე აღადგინეს. მე-19 წუთზე ანტონიო სანაბრიამ ულამაზესი მაკრატელა დარტყმით 1-1 გახადა ანგარიში.

მატჩის გადამწყვეტი გოლი მეორე ტაიმის დასაწყისში, 47-ე წუთზე გავიდა. ჯარიმიდან ჩაწოდების შემდეგ თავური დარტყმით გოლი ომარ ალდერეტემ გაიტანა და საბოლოოდ მასპინძელ გუნდს 3 ქულაც მოუტანა. არგენტინელებმა თამაშის დარჩენილ დროში მინიმუმ ქულის მოპოვება ვეღარ მოახერხეს და შეხვედრა 2-1 დასრულდა.

11 მატჩის შემდეგ არგენტინა 22 ქულით ცხრილში პირველ ადგილზეა, პარაგვაის კი 16 ქულა აქვს და მე-6 პოზიციაზეა.

სამხრეთ ამერიკიდან მსოფლიო ჩემპიონატზე 6 საუკეთესო გუნდი გადის.