VIDEO: სენსაციური მარცხი დიდი სხვაობით - ტორონტომ შარლოტთან ამჯერად შინ წააგო

სანდრო მამუკელაშვილის ტორონტო რეპტორსმა შარლოტ ჰორნეთსთან მიმდინარე სეზონში მე-2 მატჩი წააგო. კანადელები თავიანთ დარბაზში 25-ქულიანი სხვაობით დამარცხდნენ - 86:111.

30 ნოემბერს, ჰორნეთსმა რეპტორსს ოვერტაიმით მოუგო და 9-მატჩიანი მოგებათა სერია დაუსრულა, გამთენიისას კი კიდევ უფრო დიდი სენსაცია შექმნა და უკვე კანადაში დიდი უპირატესობით აჯობა. იქამდე, 18 ნოემბერს გამართული კიდევ ერთი საამსეზონო ურთიერთშეხვედრა, ტორონტომ 110:108 მოიგო.

საინტერესოა, რომ შარლოტს მიმდინარე რეგულარულის 23 მატჩში 7 გამარჯვება აქვს და აქედან 2 - სწორედ რეპტორსთან.

რეპტორსს მინი კრიზისი აქვს - ბოლო 5-დან 4 შეხვედრაში (2 სწორედ შარლოტთან) დამარცხდა და კონფერენციის მე-3 ადგილის დაკარგვის საშიშროების წინაშეა. 

სანდრო ამჯერად ძირითად ხუთეულში არ ყოფილა და 19:16 წუთი ითამაშა - 3 ქულა, 3 მოხსნა, 1 ასისტი.

24 მატჩის შემდეგ, ტორონტოს 15 მოგება აქვს და აღმოსავლეთ კონფერენციის მე-3 ადგილს ინარჩუნებს - ბოსტონ სელტიქსს, მაიამი ჰიტსა და გოგა ბითაძის ორლანდო მეჯიქს 23-23 შეხვედრაში 14-14 გამარჯვება აქვთ.

8 დეკემბრის 00:30 საათზე, რეპტორსი სწორედ თავის ერთ-ერთ კონკურენტ ბოსტონ სექტიქსს საკუთარ დარბაზში მიიღებს.