ვინ დააკლდება მანჩესტერ სიტის? - დანაკლისი, რომელმაც პეპის გეგმები ჩაშალა

მანჩესტერ სიტის საჩემპიონო რბოლაში სერიოზული პრობლემა შეექმნა.

გუნდის ნახევარდაცვის გული, როდრი, საზარდულის ტრავმის გამო ბარნლისთან გასვლას გამოტოვებს. პეპ გვარდიოლამ დაადასტურა, რომ 2024 წლის ოქროს ბურთის მფლობელმა დაზიანება არსენალთან მოგებულ მატჩში მიიღო.

გაურკვევლობა დაბრუნების ვადებზე

როდრიმ არსენალთან შეხვედრაში მოედანი 88-ე წუთზე კოჭლობით დატოვა. სამედიცინო შემოწმება უკვე ჩატარდა, თუმცა გვარდიოლა ჯერჯერობით ვერ ამბობს, როდის დაუბრუნდება ესპანელი მოედანს. კითხვის ნიშნის ქვეშ დგას მისი მონაწილეობა ინგლისის თასის ნახევარფინალში საუთჰემპტონთან, რომელიც ამ უქმეებზეა დაგეგმილი.

„ვფიქრობ, ხვალინდელი მატჩისთვის ის მზად არ იქნება. ვნახავთ, შეძლებს თუ არა თამაშს საუთჰემპტონთან ან 12 დღის შემდეგ ევერტონის წინააღმდეგ“, - განაცხადა გვარდიოლამ პრესკონფერენციაზე.

ვინ შეცვლის ლიდერს?

როდრის არყოფნაში პეპი ნიკო გონსალესის იმედად არის. მწვრთნელმა აღნიშნა, რომ ნიკომ წელს უკვე დაამტკიცა, რომ ესპანელი ვარსკვლავის შეცვლა შეუძლია. გვარდიოლას თქმით, გონსალესის დამსახურებაა, რომ სიტი დღეს იქ არის, სადაც არის.

ტრავმების სერია და პრობლემები დაცვაში

როდრისთვის ეს სეზონი ფიზიკური თვალსაზრისით საკმაოდ მძიმე გამოდგა. მან სეზონის პირველი ნახევრის დიდი ნაწილი ბარძაყის პრობლემის გამო გამოტოვა, მანამდე კი ჯვარედინი იოგების მძიმე ტრავმას მკურნალობდა. სიტის პრობლემები მხოლოდ ნახევარდაცვით არ შემოიფარგლება, ბარნლისთან მატჩს კოჭის ტრავმის გამო დაცვის ლიდერი რუბენ დიაშიც გამოტოვებს.