მას შემდეგ, რაც ჯენარო გატუზო იტალიის ნაკრების მთავარი მწვრთნელის პოსტიდან გადადგა, ანტონიო კონტეს ეროვნულ გუნდში დაბრუნებაზე აქტიურად საუბრობენ. სამშაბათს გავრცელებული ცნობებით, ნაპოლიმ უკვე შეარჩია ოთხი კანდიდატი იმ შემთხვევისთვის, თუ სკუდეტოს მომგები მწვრთნელი გუნდს დატოვებს.
კონტე და მილანის მწვრთნელი, მასიმილიანო ალეგრი, იტალიის ნაკრების თავკაცობის მთავარი კანდიდატები არიან. ასევე განიხილება რობერტო მანჩინის დაბრუნება და ინტერის ყოფილი მწვრთნელის, სიმონე ინძაგის ვარიანტიც.
ნაპოლის პრეზიდენტმა, აურელიო დე ლაურენტისმა აღნიშნა, რომ კონტე მას ბოლო წუთს არასოდეს მიატოვებს, თუმცა მაინც მოუწოდა მწვრთნელს, რაც შეიძლება მალე მიიღოს გადაწყვეტილება, რათა კლუბს შემცვლელის მოსაძებნად დრო დარჩეს.
Corriere dello Sport-ის ინფორმაციით, ნაპოლისთვის კონტეს იდეალური შემცვლელი რომას მწვრთნელი, ჯან პიერო გასპერინია. გასპერინი ნაპოლის ერთ-ერთი კანდიდატი 2024 წლის ზაფხულშიც იყო, სანამ პოსტს კონტე დაიკავებდა. მისი მომავალი რომში ახლა ბუნდოვანია, რადგან გავრცელდა ცნობები მასსა და კლუბის მრჩეველს, კლაუდიო რანიერის შორის არსებული დაძაბულობის შესახებ.
სხვა პოტენციურ კანდიდატებს შორის სახელდებიან ვინჩენცო იტალიანო (ბოლონია), ფაბიო გროსო (სასუოლო) და მაურიციო სარის შესაძლო დაბრუნება, რომელიც ნაპოლის 2015-2018 წლებში წვრთნიდა და ამჟამად ლაციოში მუშაობს.
