ჩემპიონთა ლიგაზე სულ 7 ქართველს გაუტანია: მიხეილ აშვეთიას, კახა კალაძეს, გიორგი დემეტრაძეს, ლევან კობიაშვილს, ხვიჩა კვარაცხელიას, ოთარ კიტეიშვილსა და გიორგი მიქაუტაძეს - სულ 27 გოლი. არ გაგიკვირდებათ თუ გეტყვით, რომ აქედან 15 ხვიჩას ანგარიშზეა, სამი დემეტრაძის, სამი კალაძის და სამიც კობიაშვილის. კიტეიშვილმა, აშვეთიამ და მიქაუტაძემ თავი თითო-თითოჯერ გამოიჩინეს. დღევანდელ ვლოგში ქართველების 10 გოლს გამოვარჩევთ.
10. კიტეიშვილი vs ლილი
2024/25 წლების სეზონის ლიგის ფაზის ეტაპზე ლილმა კიტეიშვილის შტურმს უმასპინძლა და 3:2 დაამარცხა. ქართველმა ფრანგების კარის აღება პირველი ტაიმის ბოლოს მოახერხა.
9. კობიაშვილი vs პსვ
ლევან კობიაშვილი ერთადერთი ქართველი ფეხბურთელია, რომელმაც ჩემპიონთა ლიგაზე ჰეთ-თრიქი შეასრულა - შალკესა და პსვ ეინდჰოვენის დაპირისპირებაში ლევანმა ნიდერლანდელების კარი სამჯერ აიღო.
8. კვარაცხელია vs ატალანტა
ატალანტა რომ კვარას ერთ-ერთი საყვარელი მეტოქეა ამ სეზონის დასაწყისშიც დამტკიცდა - ხვიჩამ პარკ დე ფრანსზე 2025/26 წლების სეზონის ერთ-ერთი მშვენება შექმნა.
7. მიქაუტაძე vs იუვენტუსი
იუვეს მცველებით გარემოცულმა ქართველმა ფორვარდმა შეტევის გაგრძელების საუკეთესო გზას მიაგნო - ნიკოლას პეპესთან გათამაშებული კომბინაცია და უშანსოდ დატოვებული მატია პერინი.
6. კვარაცხელია vs ბაიერნი
ჩემპიონთა ლიგის პირველ ნახევარფინალურ მატჩში პარკ დე ფრანსზე ანგარიში ჰარი კეინმა გახსნა. პარი სენ-ჟერმენი თამაშში ხვიჩა კვარაცხელიამ დააბრუნა - ფლანგიდან ცენტრისკენ შესვლა და უშანსოდ დატოვებული მანუელ ნოიერი.
5. კვარაცხელია vs სპორტინგი
79-ე წუთისთვის პსჟ ლისაბონში ლუის სუარესის გოლით მარცხდებოდა. ქართველმა ანგარიში საოცარი გოლით გაათანაბრა - შორეულ ცხრიანში დარტყმულს რუი სილვამ ვერაფერი მოუხერხა.
4. დემეტრაძე vs ბაიერნი
კიევის დინამომ მიუნხენის ბაიერნს ქართველების გოლებით 2:0 სძლია. პირველ ტაიმში ვესელსის კარი კალაძემ აიღო, საბოლოო ანგარიში კი ბრწყინვალე მაკრატელა დარტყმით გიორგი დემეტრაძემ დააფიქსირა.
3. კვარაცხელია vs ჩელსი
პარიზში გამართული პირველი მერვედფინალურ დაპირისპირებაში პსჟ-ს მხსნელად ხვიჩა კვარაცხელია მოევლინა - შეცვლაზე შემოსულმა ქართველმა ლონდონელების კარი ორჯერ აიღო, ხოლო ვიტინიას გოლზე საგოლე გადაცემა მიითვალა. გამორჩეული იყო ხვიჩას პირველი გოლი იორგრნსენის კარში.
2. კვარაცხელია vs ასტონ ვილა
2024/25 წლების სეზონის მეოთხედფინალიში პსჟ ასტონ ვილას შეხვდა და პირველი თამაში შინ 3:1 მოიგო. 49-ე წუთზე პარიზელები წინ კვარამ გაიყვანა - თავბრუდახვეული ბირმინგემელი მცველები და ყუმბარისებული გასროლა ემი მარტინესის კარში.
1. კვარაცხელია vs ინტერი
2025 წლის 31 მაისს, ხვიჩა კვარაცხელია გახდა პირველი ქართველი, ვინც ჩემპიონთა ლიგის ფინალში გაიტანა. ქართველი დემბელეს გადაცემის შემდეგ იან სომერთან პირისპირ აღმოჩნდა და პარიზელთა უპირატესობა ოთხ ბურთიანი გახადა.
