11 წამში - სულამანიძე ფინალშია!

პარიზის 2024 წლის ოლიმპიადაზე ძიუდოში კაცთა -100 კგ. წონით კატეგორიაში საქართველოს ღირსებას ილია სულამანიძე იცავს.

1/2 ფინალში ქართველის მეტოქე შვეიცარიელი დანიელ აიხი იყო, რომელიც ილიამ 11 წამში იპონით დაამარცხა. სულამანიძე სადებიუტო ოლიმპიადაზე ფინალში გავიდა და მედალი გაინაღდა. საქართველოს დელეგაციას კი მე-3 მედალი ჩაეწერება აქტივში.

ქართველი ფინალში აზერბაიჯანელ ზელიმ კოცოიევს დაუპირისპირდება, რომელმაც უზბეკი მუზაფარბეკ ტურობოიევი დაამარცხა. სულამანიძეს კოცოიევთან ურთიერთშეხვედრებში 2 მოგება და 2 წაგება აქვს.

ილიამ თავის სადებიუტო ოლიმპიადაზე ასპარეზობა 1/8 ფინალიდან დაიწყო. მისი მეტოქე იტალიელი ჯენარო პირელი იყო. ქართველმა პირველ შეხვედრაში მეტოქე 2 წუთში იპონით დაამარცხა და 1/4 ფინალში სწორედ ასე გავიდა, სადაც მოქმედ ოლიმპიურ ჩემპიონ იაპონელ აარონ ვულფს დაუპირისპირდა და მას ვაზარით აჯობა.

მედლის მოპოვების შანსი აქვს კიდევ ერთ ქართველს. ესპანეთის სახელით მოასპარეზე ნიკოლოზ შერაზადიშვილმა ვულფს მოუგო და ბრინჯაოს მედლისთვის უზბეკ ტურობოიევს შეხვდება.