დღეს მანჩესტერ სიტი პრემიერ ლიგის ახალი სეზონის პირველ მატჩს ითამაშებს.
სპორტული სამყაროს დიდი ნაწილი მიიჩნევს, რომ ენცო მარესკას სიტიში წარმატების მიღწევა ძალიან უნდა გაუჭირდეს.
წარმოგიდგენთ მსგავსი მოსაზრებების 3 მთავარ მიზეზს:
1. საკვანძო მოთამაშეების დაკარგვა და ლიდერების ვაკუუმი
გუნდში უზარმაზარი საკადრო ცვლილებები მოხდა, რამაც პირდაპირ დაარტყა სიტის ხერხემალს. კლუბი დატოვეს ისეთმა მნიშვნელოვანმა ფიგურებმა და ლიდერებმა, როგორებიც არიან: როდრი, ბერნარდუ სილვა და ჯონ სტოუნსი.
გარდა ამისა, სავინიო ტოტენჰემში გადასვლასთანა ახლოსაა და გაურკვეველია ომარ მარმუშისა და ნიკო გონსალესის მომავალიც. ამან შექმნა სერიოზული ლიდერების ვაკუუმი. ახალი მოთამაშეებით გუნდის გაახალგაზრდავება პერსპექტიულია, თუმცა გასახდელში გამოცდილი მენტორების მკვეთრი ნაკლებობაა, რაც კრიტიკულ მომენტებში გუნდს აუცილებლად დაეტყობა.
2. პეპ გვარდიოლას მემკვიდრეობა და დროის დეფიციტი
მარესკა ცვლის მწვრთნელს, რომელმაც 10 წლის განმავლობაში 20 ტიტული (მათ შორის 6 პრემიერ ლიგა) მოიგო. მანჩესტერ სიტიში ჩამოყალიბებულია კულტურა, რომლის მიხედვითაც მხოლოდ ტიტულების მოგებაა მისაღები და ნებისმიერი სხვა შედეგი წარუმატებლობად ფასდება.
თავად მარესკა აღიარებს, რომ ამხელა ცვლილებების ფონზე გუნდს დასტაბილურებისთვის დრო სჭირდება, თუმცა თანამედროვე ფეხბურთში და განსაკუთრებით სიტიში, მას ამ დროს არავინ მისცემს. მოლოდინები უზარმაზარია, რასაც ზედ დაერთო ქომუნითი შილდზე არსენალთან 3-0 მტკივნეული მარცხი.
3. 115 ბრალდება
კლუბის თავზე კვლავ შავი ღრუბელივით ტრიალებს პრემიერ ლიგის მიერ წაყენებული 115 ფინანსური ბრალდება. პეპ გვარდიოლა იყო ოსტატი, როდესაც საქმე მედიასთან კომუნიკაციასა და ამ თემებისგან ფეხბურთელების იზოლირებას ეხებოდა. ის ჭკვიანურად იგერიებდა ჟურნალისტების შეტევებს.
მარესკას მოუწევს მუდმივად უპასუხოს რთულ, არასაფეხბურთო კითხვებს მედიის მხრიდან. მოლოდინია, რომ ამ საკითხზე განაჩენი სწორედ მისი პირველი 12 თვის განმავლობაში დადგება. ამხელა გარე წნეხთან გამკლავება, განსაკუთრებით მაშინ, როცა გუნდის შენების პროცესში ხარ, უდიდესი გამოწვევაა და დიდი შანსია, რომ მწვრთნელისთვის ეს სერიოზულ ყურადღების გამფანტველ ფაქტორად იქცეს.
ახალი ერა ყოველთვის გაურკვევლობებითაა სავსე. მიუხედავად იმისა, რომ გუნდში რჩებიან ვარსკვლავები, გამოცდილების ნაკლებობა, გარე წნეხი და პეპის დატოვებული აწეული თამასა მარესკას წარმატების შანსებს საკმაოდ ამცირებს.
