ბარსელონას ვეტერანმა სუპერვარსკვლავმა საკუთარ მომავალზე ისაუბრა – „50 პროცენტითაც არ ვარ დარწმუნებული, რომელი გზა ავირჩიო“.
სეზონის დასრულებამდე მხოლოდ რამდენიმე თვე რჩება, თუმცა ბარსელონას ვეტერანი, რობერტ ლევანდოვსკის მომავალი ჯერ კიდევ გაურკვეველია.
პოლონეთის ნაკრების კაპიტნის კონტრაქტი ბლაუგრანასთან ივნისში იწურება და ამ დრომდე ხელშეკრულების გახანგრძლივებაზე მოლაპარაკებები არ დაწყებულა.
37 წლის ასაკში, ევროპული ფეხბურთის უმაღლეს დონეზე გატარებული თხუთმეტ წელზე მეტი ხნის შემდეგ, ლევანდოვსკი კარიერის საკვანძო მომენტს უახლოვდება და მნიშვნელოვანი გადაწყვეტილება აქვს მისაღები. The Athletic-თან ინტერვიუში მან ხაზგასმით აღნიშნა, რომ საბოლოო გადაწყვეტილების მიღებამდე დრო სჭირდება. „არ ვიცი, რადგან ეს უნდა ვიგრძნო. ჯერჯერობით ვერაფერს ვიტყვი, რადგან 50 პროცენტითაც არ ვარ დარწმუნებული, რომელი გზა ავირჩიო“, – განმარტა მან.
ლევანდოვსკიმ აღიარა, რომ დაგროვილი გამოცდილება ამ სიტუაციასთან ბევრად მშვიდად გამკლავების საშუალებას აძლევს, ვიდრე ეს კარიერის ადრეულ ეტაპზე იქნებოდა. „ჩემი ასაკისა და გამოცდილების გათვალისწინებით, გადაწყვეტილება ახლავე არ უნდა მივიღო. შესაძლოა, ეს სამი თვის შემდეგ დამჭირდეს, მაგრამ მაშინაც არ ვიქნები დაძაბული. ეს შინაგანად უნდა ვიგრძნო, რათა ჩემს მომავალზე საუბარი უფრო გამიმარტივდეს“, – დასძინა მან.
ლევანდოვსკის ბარსელონაში დარჩენა დამოკიდებული იქნება როგორც მის პირად გადაწყვეტილებაზე, ისე კლუბის გეგმებზე. ამავდროულად, იზრდება ინტერესი ამერიკული MLS-იდან, სადაც ჩიკაგო ფაირი მის სიტუაციას განსაკუთრებულ ყურადღებას აქცევს.
მიუხედავად გაურკვევლობისა, ლევანდოვსკიმ დადებითად ისაუბრა ბარსელონაში გატარებულ პერიოდზე, სადაც ის 2022 წლის ზაფხულში, ბაიერნ მიუნხენიდან გადავიდა. „ბოლო წლებში ბარსაში ყოფნამ დამანახა, თუ რამდენი შრომა და თავდადება სჭირდება კლუბის წინსვლას. აქ დიდი ამბიცია და მომავლის რწმენაა“, – თქვა პოლონელმა შემტევმა.
ლევანდოვსკიმ ასევე ხაზი გაუსვა კლუბში ინსტიტუციური სტაბილურობის მნიშვნელობას და საპრეზიდენტო არჩევნების წინ ჟოან ლაპორტას საჯარო მხარდაჭერა გამოუცხადა. „ბარსელონასნაირი კლუბისთვის სტაბილურობა და გრძელვადიანი პროექტისადმი ნდობა ფუნდამენტურია. მე მჯერა უწყვეტობის და იმ ადამიანების, ვისაც ნამდვილად ესმით ამ კლუბის ღირებულებები და იდენტობა“, – განაცხადა მან.
ამავე ინტერვიუში თავდამსხმელმა იმ ფაქტორებზეც ისაუბრა, რაც მას 37 წლის ასაკშიც მაღალ კონკურენტუნარიანობას უნარჩუნებს. ერთ-ერთ მთავარ ცვლილებად მან ცხოვრების წესის რადიკალური შეცვლა დაასახელა, რაც ჯერ კიდევ 20-25 წლის ასაკში გააკეთა.
ლევანდოვსკიმ განმარტა, რომ რაციონიდან გლუტენი და ლაქტოზა ამოიღო მას შემდეგ, რაც აღმოაჩინა, რომ გარკვეული პროდუქტები მის ფიზიკურ მონაცემებზე უარყოფითად მოქმედებდა. „ვფიქრობდი, რომ რადგან გამხდარი ვიყავი, ყველაფრის ჭამა შემეძლო, მაგრამ ვარჯიშის დროს ძალა არ მყოფნიდა. ცვლილებების შემდეგ, სულ რამდენიმე კვირაში, სხვაობა უზარმაზარი იყო“, – აღნიშნა მან.
