46 წლის შემდეგ, როცა Miracle on Ice-ის გუნდმა 1980-ის ზამთრის ოლიმპიადაზე ყინულის ჰოკეის ისტორიაში თავისი სახელი ოქროს ასოებით ჩაწერა, შეერთებულმა შტატებმა გულშემატკივრებს ახალი ოლიმპიური მოგონება აჩუქა და მამაკაცთა ფინალში კანადა დამატებით დროში 2-1 დაამარცხა.
ეს ამერიკისთვის მამაკაცთა ყინულის ჰოკეიში მესამე ოლიმპიური ოქროა და პირველი 1980 წლის გამარჯვების შემდეგ. გმირი ჯეკ ჰიუზი გახდა, რომელმაც დამატებით დროში გადამწყვეტი გოლი გაიტანა და შეერთებულ შტატებს ოქრო მოუტანა.
საოცარი ტურნირი გამოვიდა ჰიუზების ოჯახისთვის. ქუინ ჰიუზმა მეოთხედფინალში შვედეთის წინააღმდეგ დამატებით დროში გამარჯვების გოლი გაიტანა, ხოლო მისმა ძმამ ჯეკმა ფინალში იგივე გაიმეორა.
მათმა დედამ, ელენ ჰიუზმა, რომელიც აშშ-ის ქალთა ჰოკეის გუნდთან მუშაობს, ასევე ოქროს მედალი იზეიმა, ამერიკელი ქალები ასევე ოლიმპიური ჩემპიონები გახდნენ.
„მას თამაში ყველაზე მეტად უყვარს, ამ ტურნირზე მან აჩვენა, რომ აშკარად მსოფლიოს ერთ-ერთი საუკეთესო მოთამაშეა.“ - თქვა ქუინმა ძმის შესახებ.
როგორც შეერთებულმა შტატებმა, ისე კანადამ სრულად NHL-ის მოთამაშეებით დაკომპლექტებული შემადგენლობებით იასპარეზეს, შესაბამისად მამაკაცთა ოლიმპიურმა ფინალმა თამაშის უმაღლესი დონე ნამდვილად წარმოაჩინა.
ბრინჯაოს მედალი ფინეთის ნაკრებმა მოიპოვა, რომელმაც სლოვაკეთი დაამარცხა. კვირის დასაწყისში კი შეერთებულმა შტატებმა ქალთა ფინალში ასევე კანადა დაამარცხა.
