CONMEBOL-ის პრეზიდენტმა ალეხანდრო დომინგესმა საფეხბურთო სამყარო გააოცა განცხადებით, რომ 2030 წლის მსოფლიო ჩემპიონატზე მონაწილე გუნდების რაოდენობა 64-მდე გაიზრდება.
ეს 2026 წლის ტურნირთან შედარებით კიდევ ერთი მნიშვნელოვანი გაფართოება იქნება. მსოფლიო ჩემპიონატზე ტრადიციულად 16 გუნდი მონაწილეობდა, 1982 წელს მონაწილეთა რაოდენობა 24-მდე გაიზარდა, ხოლო 1998 წლიდან ტურნირზე 32 ნაკრები ასპარეზობდა. 2026 წლის ჩემპიონატი ისტორიაში პირველი 48-გუნდიანი მუნდიალი იყო.
CONMEBOL-ის პრეზიდენტმა ალეხანდრო დომინგესმა სოციალურ ქსელში განაცხადა, რომ მსოფლიო ჩემპიონატის 100 წლის იუბილეს აღსანიშნავად 2030 წლის ტურნირზე 64 ნაკრები მიიღებს მონაწილეობას.
2030 წლის მსოფლიო ჩემპიონატი ისედაც გამორჩეული ფორმატით გაიმართება: პირველი მატჩები ურუგვაიში, არგენტინასა და პარაგვაიში ჩატარდება, ხოლო ტურნირის ძირითადი მასპინძლები მაროკო, პორტუგალია და ესპანეთი იქნებიან.
ბუნებრივია, თუ მონაწილეთა რაოდენობა 64-მდე გაიზრდება, ეს მნიშვნელოვნად შეცვლის საკვალიფიკაციო სისტემასაც.
FIFA-ს პრეზიდენტმა ჯანი ინფანტინომ ეს იდეა მანამდეც გააჟღერა და აღნიშნა, რომ საკითხს აშშ-ში, კანადასა და მექსიკაში გასამართი 2026 წლის მსოფლიო ჩემპიონატის დასრულების შემდეგ განიხილავენ.
„მსოფლიო ჩემპიონატის ორგანიზებისას მნიშვნელოვანია, რომ ის მთელი მსოფლიოსთვის იყოს და არა მხოლოდ ევროპისა და სამხრეთ ამერიკისთვის. რეალურად, ყველა ქვეყანას უნდა ჰქონდეს ოცნება, რომ ერთ დღეს მსოფლიო ჩემპიონატზე ითამაშებს,“ - განაცხადა ინფანტინომ.
