ესპანეთის ნაკრების ნახევარმცველმა გავიმ უპასუხა შეკითხვას იმის შესახებ, უნდა დაისაჯოს თუ არა არგენტინის ნაკრების ფეხბურთელი ლეანდრო პარედესი 2026 წლის მსოფლიო ჩემპიონატის ფინალის შემდეგ გამოვლენილი ქცევის გამო.
გადამწყვეტ მატჩში ევროპელებმა სამხრეთამერიკელები 1:0 დაამარცხეს და ტიტული მოიპოვეს. საფინალო სასტვენისთანავე მოედანზე გუნდებს შორის მასობრივი დაპირისპირება ატყდა.
არგენტინელთა მცველმა ნაუელ მოლინამ ჩარბენილ ესპანელთა კაპიტან როდრის მკერდში ხელი ჰკრა. მანჩესტერ სიტის ნახევარმცველი შეჩერდა, მოლინას მიუახლოვდა და მათ შორის შელაპარაკება დაიწყო, რასაც სხვა ფეხბურთელებიც შეუერთდნენ, მათ შორის ლეანდრო პარედესიც.
პარედესმა ჯერ აგრესიულად ჰკრა ხელი ესპანელთა მცველ ერიკ გარსიას, შემდეგ კი ყელში სწვდა. თანაგუნდელის დასაცავად გავი ჩაერია, თუმცა ბოკა ხუნიორსის ნახევარმცველმა ესპანელი მინდორზე წააქცია.
„არა, არა. მართალი რომ გითხრათ, არ ვფიქრობ, რომ ის უნდა დასაჯონ. მესმის, რომ ეს ბავშვებისთვის კარგი მაგალითი არ არის, მაგრამ მიმაჩნია, რომ ფეხბურთს უფრო სასტიკი მხარეც აქვს.
შესაძლოა, ყველაზე ლოგიკური მისი მატჩის მსვლელობისას გაძევება ყოფილიყო და მორჩა. თუმცა, როგორც უკვე ვთქვი, ეს ფეხბურთია და ასე იყო ყოველთვის“, - განაცხადა გავიმ.
