6 მთავარი ბრძოლა, რომელიც მსოფლიო თასის ფინალის ბედს გადაწყვეტს

ნიუ-ჯერსიში მუნდიალის ფინალის დრო დადგა.

ერთმანეთს ტურნირის ორი საუკეთესო გუნდი უპირისპირდება. ესპანეთი იდეალურად აწყობილი საათივით მუშაობს, სადაც ვარსკვლავურ სტატუსზე წინ გუნდურობა დგას. არგენტინა კი მოედანზე საოცარი ბრძოლისუნარიანობითა და ლიონელ მესის გენიით გადის.

ჩემპიონის ვინაობას 6 მთავარი დუელი განსაზღვრავს:

1. როდრი ენცო ფერნანდესისა და ალექსის მაკ ალისტერის წინააღმდეგ: თუ არგენტინელები ესპანეთის ნახევარდაცვის გულს სივრცეებს მისცემენ, როდრი მატჩის ტემპს მარტო გააკონტროლებს. ენცოსა და მაკ ალისტერს მისი პრესინგის ქვეშ მოქცევა მოუწევთ.

2. უნაი სიმონი ემილიანო მარტინესის წინააღმდეგ: სიმონმა მუნდიალზე მხოლოდ ერთი გოლი გაუშვა, მარტინესმა - შვიდი. თუმცა, არგენტინელი მეკარე დიდი მატჩების ფსიქოლოგიურ წნეხს იდეალურად უმკლავდება.

3. მიკელ ოიარსაბალი ხულიან ალვარესის (ან ლაუტარო მარტინესის) წინააღმდეგ: ევრო 2024-ის ფინალის გმირი ოიარსაბალი საუკეთესო ფორმაშია. ლიონელ სკალონიმ კი უნდა გადაწყვიტოს, სასტარტოში ტრავმირებული ალვარესი დააყენოს თუ ინგლისთან გამარჯვების გოლის ავტორი ლაუტარო მარტინესი.

4. მარკ კუკურელია ლიონელ მესის წინააღმდეგ: მესის მარჯვენა ფლანგზე გადასვლამ არგენტინას წარმატება მოუტანა. კუკურელიას უდიდესი ყურადღება მართებს, თუმცა მესის პასიურობამ დაცვაში შესაძლოა ესპანელ მცველს შეტევაში გზა გაუხსნას.

5. ლამინ იამალი ნიკო ტალიაფიკოს წინააღმდეგ: 19 წლის იამალის სისწრაფე და დრიბლინგი 33 წლის გამოცდილი ტალიაფიკოსთვის უდიდესი გამოცდა იქნება. თუ არგენტინელი მცველი დახმარებას ვერ მიიღებს, იამალი ფლანგს დაარბევს.

6. ლუის დე ლა ფუენტე ლიონელ სკალონის წინააღმდეგ: ესპანეთის მწვრთნელს იდეალურად დაბალანსებული ტაქტიკა აქვს, სკალონის კი ძიების პროცესი ფინალამდე მოუწია და ახლა შეცდომის უფლება აღარ აქვს.