,,ამ ეტაპზე ნამდვილად ასეა" - რა თქვა ოკონმა თავის მომავალზე?

ესტებან ოკონის განცხადებით, 2027 წლისთვის ის „ნამდვილად თავისუფალი აგენტია“.

ფრანგი პილოტის ჰაასში მომავალთან დაკავშირებით არაერთი ჭორი ვრცელდება, თავად ოკონი კი ამბობს, რომ „ფორმულა 1-ისთვის ჯერ კიდევ ბევრი აქვს მისაცემი“.

2026 წლის განმავლობაში არაერთხელ გავრცელდა ინფორმაცია, რომ ჰაასი ოკონს მომდევნო სეზონისთვის აღარ დაიტოვებდა. მაისში, კანადის გრან პრის წინ, ფრანგ მრბოლელს იმ ჭორების უარყოფაც მოუწია, თითქოს მასსა და გუნდს შორის ურთიერთობა დაიძაბა.

ამ უქმეებზე გასამართი აზერბაიჯანის გრან პრის წინ ოკონმა დაადასტურა, რომ ჰაასთან მოლაპარაკებები ჯერ კიდევ მიმდინარეობს, თუმცა მიანიშნა, რომ შესაძლოა სხვა გუნდებთანაც აწარმოებდეს საუბარს, რათა 2027 წელს ფორმულა 1-ში ადგილი შეინარჩუნოს.

ამ ეტაპზე, მომავალი წლისთვის ნამდვილად თავისუფალი აგენტი ვარ.

,,ყველა ეს მოლაპარაკება მიმდინარეობს და კულისებში არის გარკვეული საკითხები, რომლებიც ამ მომენტში ჩემს კონტროლს არ ექვემდებარება.

მე ტრასაზე ვარ კონცენტრირებული, ვცდილობ მაქსიმუმი გავაკეთო და გუნდს ის შედეგი მოვუტანო, რომელსაც იმსახურებს“, - განაცხადა ოკონმა ბაქოში გამართულ მედია დღეზე.

მიმდინარე სეზონში ოკონმა ჰაასისთვის მხოლოდ 3 ქულის მოპოვება შეძლო. მან ქულები იაპონიისა და მონაკოს გრან პრიზე აიღო.

ამასთან, მონაკოს რბოლა დღემდე ბოლო შემთხვევაა, როდესაც ჰაასის ბოლიდმა რბოლა საუკეთესო ათეულში დაასრულა.