ნიცას გაყიდვის შესახებ გავრცელებულ ცნობებს ახალი დეტალები ემატება.
კლუბი უკვე რამდენიმე თვეა ოფიციალურად გასაყიდადაა გამოტანილი, პროცესს კი საინვესტიციო ბანკი Lazard-ი მართავს. მას შემდეგ, რაც INEOS-მა მანჩესტერ იუნაიტედის წილები შეიძინა, მათი ყურადღება ნიცას მიმართ საგრძნობლად შემცირდა, რასაც ბოლო თვეებში კლუბში მინიმალური ინვესტიციებიც მოწმობს.
ამ ეტაპზე ცნობილია ორი პოტენციური მყიდველი, რომელთაგან ერთი ამერიკულია, ხოლო მეორე ევროპული. ამერიკელმა ინვესტორებმა უკვე მოინახულეს კლუბის ინფრასტრუქტურა ჟან-კლოდ ბლანთან ერთად. INEOS-ი თავდაპირველად კლუბის გაყიდვას 200 მილიონ ევროდ გეგმავდა, რაც ორჯერ აღემატება მათ მიერ 2019 წელს გადახდილ თანხას, თუმცა ამ თანხის ამოღება ნაკლებად სავარაუდო ჩანს.
საბოლოო ფასის დადგენამდე ნიცასთვის უმთავრესი ამოცანა ლიგა 1-ში ადგილის შენარჩუნებაა. კლუბი ამჟამად მხოლოდ სამი ქულით უსწრებს გასავარდნ ზონაში მყოფ ოსერს. მომდევნო უქმეებზე სწორედ ამ გუნდების პირისპირ შეხვედრა გაიმართება, რაც გადამწყვეტი იქნება ნიცას სამომავლო ღირებულებისა და გაყიდვის პერსპექტივებისთვის.
