ბრაზილიის ნაკრების მთავარმა მწვრთნელმა, კარლო ანჩელოტიმ უარყო ხმები იმის შესახებ, რომ მუნდიალის მერვედფინალის წინ ერლინგ ჰალანდის გასანეიტრალებლად განსაკუთრებული ტაქტიკური გეგმა შეიმუშავა.
მიმდინარე ტურნირზე ნორვეგიელ ფორვარდს უკვე 5 გოლი აქვს გატანილი, თუმცა იტალიელი სპეციალისტი მიიჩნევს, რომ მისი მცველები ამ გამოწვევისთვის ისედაც მზად არიან.
ანჩელოტიმ პრესკონფერენციაზე განაცხადა:
არ ვფიქრობ, რომ არსებობს რაიმე სახის 'ანტი-ჰალანდის' გეგმა. ჩემს მოთამაშეებს არ სჭირდებათ იმის სწავლება, როგორ დაიცვან თავი, ისინი მოედანზე ერთმანეთს არაერთხელ შეხვედრიან. ჩვენი გუნდია ოპტიმალურ კონდიციაშია, თუმცა გაუმჯობესება უნდა გავაგრძელოთ. ყველამ იცის, როგორ თამაშობს ის. ჩემს მცველებს მის წინააღმდეგ სამოქმედოდ არაფერს ავუხსნი
ბრაზილიელთა უკანა ხაზს ლონდონის არსენალის მცველი, გაბრიელ მაგალიაესი უხელმძღვანელებს, რომელიც ჰალანდს პრემიერ ლიგაში რეგულარულად ეთამაშება. ანჩელოტის აზრით, ეს ფაქტორი გუნდს დაეხმარება:
მათ მის წინააღმდეგ ბევრჯერ უთამაშიათ, ამიტომ ჩვენ მხოლოდ მატჩისთვის კარგად მომზადებაზე ვართ ფოკუსირებულები. ვსწავლობთ მეტოქის მთავარ მახასიათებლებს და ვიცით, რომ ისინი შეტევაში ძალიან სახიფათოები არიან. ნორვეგია რთული, კარგი სტრუქტურისა და ორგანიზაციის მქონე გუნდია, ამიტომ ჩვენი საუკეთესო თამაში უნდა ვაჩვენოთ. ვფიქრობ, ახლა ზუსტად ის მომენტია, როცა მაქსიმუმის ჩვენება შეგვიძლია, რადგან იაპონიასთან მძიმე მატჩის შემდეგ თავდაჯერებულები ვართ
ბრაზილიას საკადრო პრობლემებიც აქვს, ლუკას პაკეტამ კუნთის ტრავმა მიიღო და ამ მატჩს გამოტოვებს, თუმცა გუნდს ბარსელონას შემტევი, რაფინია უბრუნდება. ნორვეგიის ნაკრების მწვრთნელმა, სტალე სოლბაკენმა კი აღნიშნა, რომ მატჩის ბედს მხოლოდ ჰოლანდისა და ბრაზილიელი მცველების დუელი არ გადაწყვეტს:
ბრაზილიას ტურნირზე ერთ-ერთი საუკეთესო დაცვის წყვილი ჰყავს, ორი ფეხბურთელი, რომლებიც უმაღლეს საერთაშორისო დონეზე თამაშობენ. ერლინგსა და მათ შორის მძიმე ბრძოლა იქნება, მაგრამ ჩემთვის ეს უფრო ბრაზილია ნორვეგიის წინააღმდეგაა. ისინი ფავორიტები არიან, რა თქმა უნდა, თუმცა იმედი გვაქვს, რომ კარგ ბრძოლას გაუმართავთ. ჩვენი საუკეთესო ვერსია უნდა ვიყოთ, წინააღმდეგ შემთხვევაში შანსი არ გვექნება
