,,აქ დაიწყო და აქვე სრულდება" - ნეიმარი სანაკრებო კარიერის დასრულებაზე

ბრაზილია მსოფლიო ჩემპიონატს გამოეთიშა.

მერვედფინალში ნორვეგიამ ხუთგზის მსოფლიო ჩემპიონი დაამარცხა. მარცხის შემდეგ მთავარი განხილვის თემა ნეიმარის მომავალი გახდა. 

ვეტერანი თავდამსხმელი ამ შეხვედრაში სათადარიგოთა სკამიდან ჩაერთო, მატჩის მიწურულს პენალტი გაიტანა, თუმცა ტურნირის უმეტეს ნაწილში ბრაზილია უფრო ახალგაზრდა ფეხბურთელებს ენდობოდა.

ნეიმარი იმ ვარსკვლავებს შორისაა, რომელთათვისაც 2026 წლის მსოფლიო ჩემპიონატი შესაძლოა კარიერის ბოლო მუნდიალი ყოფილიყო.

თუმცა, სხვა ლეგენდებისგან განსხვავებით, ამ ტურნირზე ის არა გუნდის მთავარი ლიდერი, არამედ უფრო დამხმარე მოთამაშე იყო.

ბრაზილიის ნაკრების მარცხის შემდეგ ნეიმარმა ოფიციალურად დაადასტურა, რომ სანაკრებო კარიერას ასრულებს.

ვცადე. ნამდვილად ვცადე. ყველაფერი აქ დაიწყო და აქვე დასრულდა. ახლა ყველაფერი დასრულებულია.

სიმბოლურია, რომ მისი ბოლო სანაკრებო მატჩიც სწორედ ნიუ-იორკის „მეტლაიფ სტედიუმზე“ გაიმართა, იმავე არენაზე, სადაც მან 2010 წელს, აშშ-ის წინააღმდეგ ამხანაგურ შეხვედრაში, ბრაზილიის ნაკრებში პირველი მატჩი ჩაატარა.

მართალია, ნეიმარმა კარიერის მთავარი ოცნება, მსოფლიო ჩემპიონობის ტიტული, ვერ აისრულა, თუმცა ის ბრაზილიის ფეხბურთის ისტორიაში ერთ-ერთ ყველაზე გამორჩეულ მოთამაშედ დარჩება.

მსოფლიო ჩემპიონატებზე გატანილი გოლების რაოდენობით იგი კარიერას ბრაზილიელთა ყველა დროის საუკეთესო ბომბარდირთა სიაში მე-3 ადგილზე (9 გოლი), რონალდოსა (15 გოლი) და პელეს (12 გოლი) შემდეგ, დაასრულებს.

მთელი წლის განმავლობაში ნეიმარი აცხადებდა, რომ კარიერას სეზონიდან სეზონამდე აფასებდა და საბოლოო გადაწყვეტილებას 2026 წლის ბოლოს მიიღებდა.

მისი კლუბი სანტოსი სეზონს დეკემბერში დაასრულებს, რაც ნეიმარს დამატებით დროს მისცემს, გადაწყვიტოს, დაასრულებს თუ არა მთლიანად პროფესიონალურ კარიერას.