აქვს თუ არა საფრანგეთს საპანიკო? რა თქვა ზიდანმა მარცხის შემდეგ

საფრანგეთის ნაკრები ზინედინ ზიდანის ხელმძღვანელობით პირველად დამარცხდა - იტალიასთან 1:3 წააგო.

TF1-ის ეთერში მწვრთნელმა აღნიშნა, რომ გუნდმა შეცდომები დაუშვა, თუმცა მატჩს ჩავარდნად არ მიიჩნევს.

„პირველ ტაიმში ჩვენს გეგმას მივყვებოდით, მაგრამ როგორც კი მეტოქე დაწინაურდა, ცოტა დავიბენით. გაგვიჭირდა ორთაბრძოლებსა და ერთი-ერთზე სიტუაციებში. ეს სწავლის პროცესის ნაწილია და უმჯობესია, ასეთი რამ ახლა მოხდეს. პლეი-ოფში გასვლისთვის ბრძოლას ვაგრძელებთ.

ფეხბურთელებს ვუთხარი, რომ პანიკა საჭირო არ არის. ბურთის ფლობისას მეტი მოძრაობა გვჭირდება. იტალიელები თავს ძალიან კარგად იცავენ და მათი დაწინაურების შემდეგ საქმე გაგვირთულდა“, - თქვა ზიდანმა.

ფრანგი სპეციალისტის შეფასებით, მის გუნდს კარგი მონაკვეთებიც ჰქონდა და მარცხი ბოლომდე დამსახურებული არ ყოფილა.

„ეს მატჩი ჩავარდნა არ ყოფილა. იყო კარგიც და ცუდიც - ყველაფერს გავაანალიზებთ“, - აღნიშნა მან.