არანაირი მუხლის ტრავმა! გიორგი ჩაკვეტაძის ჯანმრთელობის მდგომარეობა გაირკვა

საბედნიეროდ, საქართველოს ნაკრების და უოტფორდის ნახევარმცველის, გიორგი ჩაკვეტაძის ტრავმა სერიოზული არ აღმოჩნდა.

ქართველმა ქოვენთრისთან (1:1) მატჩში 67-ე წუთზე საგოლე პასი მიითვალა, 80-ზე კი ტრავმა მიიღო და მოედანი საკაცით დაატოვებინეს.

კადრში ჩანდა, თითქოს გიორგი ხელს მუხლზე იკიდებდა, რამაც გულშემატკივართა მღელვარება გამოიწვია.

საბედნიეროდ, ჩაკვეტაძე სერიოზულ ტრავმას გადაურჩა. როგორც უოტფორდის მთავარმა მწვრთნელმა, ტომ კლევერლიმ განაცხადა, ფეხბურთელს ზურგი გაუშეშდა.

„ჩაკვეტაძის მდგომარეობა დამაკმაყოფილებელია. გიორგის წელის ქვედა არეში ჰქონდა სპაზმი, რის გამოც გადაადგილება გაუჭირდა. გასახდელში ის უკვე უკეთ იყო და წამოჯდომაც შეძლო." - აღნიშნა ინგლისელმა მწვრთნელმა.