პსჟ-ს უახლოეს დღეებში ფეხბურთის ისტორიაში ახალი ფურცლის დაწერის შანსი აქვს თუ ჩემპიონთა ლიგის ფინალში არსენალს დაამარცხებს.
მთელი გუნდი ამ ისტორიულ მიზანზეა ფოკუსირებული, თუმცა პარალელურად უკვე აქტიურად საუბრობენ სატრანსფერო გეგმებზეც. პარიზულ კლუბს შემადგენლობის რადიკალურად შეცვლა არ სურს, მათი მიზანი ლუის ენრიკეს პროექტში ჩართული წამყვანი მოთამაშეების შენარჩუნებაა.
ავტორიტეტული სპორტული ჟურნალისტის, ჯანლუკა დი მარციოს განცხადებით, არსენალისა და ლივერპულის ინტერესის მიუხედავად, ხვიჩა კვარაცხელიასა და ბრედლი ბარკოლას მიერ კლუბის დატოვების შანსი პრაქტიკულად არ არსებობს. დი მარციომ ხაზგასმით აღნიშნა, რომ პარიზელ გულშემატკივრებს სანერვიულო არაფერი აქვთ, რადგან ქართველი ვარსკვლავი გუნდში თავს შესანიშნავად გრძნობს:
არ ვფიქრობ, რომ არსებობს რაიმე შანსი იმისა, რომ კვარაცხელიამ პსჟ დატოვოს. ის გუნდში წელიწად-ნახევრის წინ მოვიდა, აქვს ძალიან მაღალი ხელფასი, თამაშობს უდიდეს კლუბში და იმყოფება ბრწყინვალე დინამიკაში. ამ ეტაპზე მისი წასვლის არანაირ შესაძლებლობას არ ვხედავ.
იგივე ვითარებაა ბრედლი ბარკოლასთან დაკავშირებითაც. მიუხედავად იმისა, რომ კვარაცხელიასა და დეზირე დუეს მხრიდან არსებული დიდი კონკურენციის გამო ფრანგს სათამაშო დრო ხშირად არ ეთმობა, ლუის ენრიკე მას ძალიან აფასებს და კლუბი მასთან კონტრაქტის გახანგრძლივებაზე უკვე აწარმოებს მოლაპარაკებებს.
პსჟ ცვლილებებს სხვა პოზიციებზე გეგმავს. გავრცელებული ინფორმაციით, კლუბი სერიოზულად ინტერესდება პორტუს მეკარით, დიეგო კოშტათი, რომლის გამოსასყიდი თანხა 66 მილიონ დოლარს შეადგენს, რამაც შესაძლოა მატვეი საფონოვის ძირითადის მეკარეობა კითხვის ნიშნის ქვეშ დააყენოს. გარდა ამისა, ლუის ენრიკეს თავდასხმის ხაზის გაძლიერება ხულიან ალვარესის ტრანსფერით სურს.
