ბაიერნის 17 წლის ნახევარმცველმა ლენნარტ კარლმა სოციალურ ქსელებში დაკომენტარების ფუნქცია შეზღუდა მას შემდეგ, რაც მომავალში მადრიდის რეალში გადასვლის სურვილზე გაკეთებული განცხადების გამო კრიტიკის ქვეშ მოექცა.
ახალგაზრდა ფეხბურთელმა ფან-კლუბის წევრებთან შეხვედრისას თქვა:
„ბაიერნში თამაში რაღაც განსაკუთრებულია. მაგრამ მინდა, ერთ დღეს მადრიდის რეალში გადავიდე — ეს ჩემი ოცნების კლუბია“.
მას შემდეგ, რაც კარლის სიტყვები მედიაში გავრცელდა, ბაიერნის გულშემატკივრების ნაწილმა ფეხბურთელის ინსტაგრამზე ნეგატიური კომენტარების დატოვება დაიწყო. ისინი მას კლუბიდან წასვლას ურჩევდნენ და ხელმძღვანელობასა და მთავარ მწვრთნელ ვენსან კომპანის სანქციების დაწესებასაც სთხოვდნენ — მათ შორის სეზონის ბოლომდე სათადარიგოთა სკამზე დატოვებას.
მომხდარის ფონზე ლენნარტ კარლმა საკუთარ გვერდზე კომენტარების დატოვების შესაძლებლობა შეზღუდა.
