ბარსას ფლიკის კონტრაქტის გახანგრძლივება სურს

ბოლო ორი წლის განმავლობაში ბარსელონამ ოთხი ტიტული მოიგო და მალე მეხუთესაც დაუმატებს, როდესაც ზედიზედ მეორედ ლა ლიგის ჩემპიონობას გაინარდებს.

მიუხედავად იმისა, რომ ბარსელონა ჩემპიონთა ლიგაზე ორჯერ დამარცხდა, მათ შორის ამ სეზონში მადრიდის ატლეტიკოსთან, ჰანსი ფლიკის ავტორიტეტი კლუბში ძალიან ძლიერია. მას ჟოან ლაპორტა აღმერთებს, რომელმაც უკვე გამოხატა გერმანელი მთავარი მწვრთნელისთვის კონტრაქტის განახლების სურვილი.

მოლაპარაკებები ლა ლიგის დასრულების შემდეგ იგეგმება, თუმცა MD-ის ინფორმაციით, ფლიკს ბარსელონასთან უკვე აქვს შეთანხმება კონტრაქტის ერთი წლით, 2028 წლამდე გახანგრძლივებაზე. ფლიკმა უკვე აცნობა კლუბს, რომ მოხარულია დარჩეს კიდევ ერთი სეზონით, რადგან ტკბება კატალონიის დედაქალაქში ცხოვრებით და მტკიცედ აქვს გადაწყვეტილი, განაგრძოს კლუბისთვის წარმატებების მოტანა.

ახალი შეთანხმება ასევე მოიცავს პუნქტს, რომლის მიხედვითაც 61 წლის მწვრთნელის ყოფნა კლუბში შესაძლოა კიდევ 12 თვით, 2029 წლამდე გახანგრძლივდეს. ამ პუნქტის ასამუშავებლად ორივე მხარის თანხმობაა საჭირო, რაც იმას ნიშნავს, რომ არსებობს შანსი, რომ გერმანელმა სპეციალისტმა გუნდი ორ წელიწადში დატოვოს.

ბარსელონასთვის ფლიკის შენარჩუნება ლოგიკური ნაბიჯია იმ წარმატებების გათვალისწინებით, რასაც მან 2024 წლიდან მიაღწია. ამ სიახლეს გულშემატკივრებიც მიესალმებიან, თუმცა მწვრთნელზე მაინც იქნება ზეწოლა, რომ საბოლოოდ დაასრულოს ჩემპიონთა ლიგის ტიტულის მოლოდინი, რომელიც ამ სეზონის წარუმატებლობის შემდეგ უკვე 12 წლამდე გაიზარდა.