ბარსელონა რეკონსტრუირებულ კამპ ნოუზე ლეო მესის საპატივცემლო მატჩის ჩატარებაზე მუშაობს

ბარსელონა განახლებულ კამპ ნოუზე ლეო მესის საპატივცემლო მატჩის ორგანიზებაზე მუშაობს.

როგორც 3Cat იტყობინება, კატალონიური კლუბი არგენტინელი ფეხბურთელის ოჯახს უკვე დაუკავშირდა და თავად მესიმ მსგავსი მატჩის ჩატარებაზე თანხმობა განაცხადა.

ლეო მესის საპატივცემლო მატჩის გამართვა იმ დროისთვის იგეგმება, როცა ახალ კამპ ნოუს სახურავი ექნება და მაყურებელთა დასწრების ყველანაირი შეზღუდვები მოიხსნება. სტადიონის სრული რეკონსტუქციის დასრულება 2026/27 წლების სეზონისთვის არის დაგეგმილი.

განახლებულ არენაზე თავის პირველ მატჩს ბარსელონა 10 აგვისტოს, ჟოან გამპერის თასის ფარგლებში გამართავს - სავარაუდოდ, აღნიშნულ შეხვედრაზე დაშვებული იქნება 28-დან 35 ათასამდე მაყურებელი.

ამის შემდეგ, გუნდის საშინაო მატჩებზე 50-დან 60 ათასამდე მაყურებელს დაუშვებენ, ხოლო თამაშებს შორის პერიოდში კამპ ნოუს რეკონსტუქცია გაგრძელდება.