ბარსელონას სპორტული დირექტორი, დეკო, ერთ-ერთი პირველი იყო, ვინც ჟოან ლაპორტას საპრეზიდენტო არჩევნებში გამარჯვება მიულოცა. ლაპორტასთან მრავალწლიანი მუშაობის გამოცდილების მქონე დეკოსთვის თავიდანვე ცნობილი იყო, რომ წინასაარჩევნო პროცესში ის მოქმედი პრეზიდენტის გვერდით იდგებოდა.
ლაპორტას დამაჯერებელმა გამარჯვებამ ვიქტორ ფონტზე კიდევ ერთხელ დაადასტურა, რომ კლუბის წევრები ამჟამინდელ ხელმძღვანელობას სრულად ენდობიან.
ოფიციალურად: ჟოან ლაპორტა ბარსელონა პრეზიდენტად 2031 წლამდე აირჩიეს
პასუხი კრიტიკოსებს
მიუხედავად პოზიტიური განწყობისა, რაც არჩევნებსა და სევილიასთან მოპოვებულ გამარჯვებას (5-2) მოჰყვა, სპორტულმა დირექტორმა თავი აარიდა იმ ადამიანებთან კამათს, რომლებიც მის სატრანსფერო გადაწყვეტილებებს მანამდე ეჭვქვეშ აყენებდნენ. სიმბოლურია, რომ სევილიასთან მატჩში გოლები სწორედ მის მიერ მოყვანილმა ფეხბურთელებმა: რაფინიამ, დანი ოლმომ და ჟოაუ კანსელომ გაიტანეს.
ჩვენ ყველაფერი გავაკეთეთ კანსელოს დასამატებლად, რადგან მან არაერთხელ დაამტკიცა, რომ ბარსელონას ფანატიკური გულშემატკივარია. დღევანდელ ფეხბურთში ასეთი დამოკიდებულება იშვიათობაა და ჩვენ ვცდილობთ, ეს სულისკვეთება გუნდში დავაბრუნოთ.
მიუხედავად ბოლოდროინდელი წარმატებული ტრანსფერებისა, ის საკუთარ დამსახურებებზე საუბარს ერიდება:
მე არავინ მომიყვანია, უბრალოდ ვცდილობ ჩემი საქმე მაქსიმალურად კარგად გავაკეთო. ზედმეტი ქება არ მიყვარს, მთავარი კლუბია.
დეკომ ახალგაზრდა მცველის, ხავი ესპარტის შესახებაც ისაუბრა, რომელმაც სადებიუტო მატჩის შემდეგ სპოტიფაი კამპ ნოუზე სასტარტო შემადგენლობაში პირველად ითამაშა:
დებიუტი ყოველთვის რთულია, თუმცა ხავი ესპარტი ის ფეხბურთელია, რომელსაც გუნდისთვის ბევრი სარგებლის მოტანა შეუძლია.
ხუმრობა და ფინანსები
როდესაც კითხვა ბარსელონას ფინანსურ მდგომარეობასა და ახალი ფეხბურთელების რეგისტრაციას შეეხო, დეკომ სიფრთხილე გამოიჩინა:
დღეს კლუბისთვის გადამწყვეტი დღე იყო. ამიერიდან უნდა გავაანალიზოთ, რას გავაკეთებთ მომავალში. ხულიან ალვარესზე ან ერლინგ ჰოლანდზე მეკითხებით? კი, ახლავე ყველაფერს დაგაფქვამთ.
ჩავისა და ლაპორტას შესახებ
სპორტულმა დირექტორმა კომენტარი არ გააკეთა ჩავი ერნანდესის იმ განცხადებებზე, რომლებიც ლიონელ მესისა და ალეხანდრო ეჩევერიას ეხებოდა.
ჩავი ჩემი ახლო მეგობარი და ყოფილი თანაგუნდელია. მასთან ერთად ბევრი რამ მაქვს მოგებული და დიდ პატივს ვცემ. ის ნამდვილი ბარსელონელია და აქვს უფლება, საკუთარი აზრი გამოთქვას. ეს დემოკრატიაა.
ბოლოს მან კლუბის ერთ-ერთ მთავარ სიძლიერეზე გაამახვილა ყურადღება:
ლაპორტასა და პირველ გუნდს შორის საოცარი ურთიერთგაგებაა. ეს ის თაობაა, რომელიც კლუბთან საკუთარ თავს სრულად აიგივებს და ეს ბუნებრივიცაა.
