ბორნმუთმა ლივერპულის წაუგებელი სერია დაასრულა

ინგლისის პრემიერ ლიგის 23-ე ტურში ბორნმუთმა საკუთარ მოედანზე ლივერპული მიიღო და 3-2 დაამარცხა.

მასპინძლებმა პირველ ტაიმში ორბურთიანი უპირატესობა მოიპოვეს. 26-ე წუთზე ანარიში ევანილსონმა გახსნა, ხოლო 33-ე წუთზე ალეხანდრო ხიმენესმა გაზარდა სხვაობა ორამდე.

45-ე წუთზე დომინიკ სობოსლაის კუთხურიდან ჩაწოდების შემდეგ ვირჯილ ვან დაიკმა თავური დარტყმით ერთი ბურთი გაქვითა და პირველი ტაიმის ანგარიში (2-1) დააფიქსირა.

მე-80 წუთზე საჯარიმო დარტყმის დროს მოჰამედ სალაჰის დაგორების შემდეგ, სობოსლაიმ ლამაზი დარტყმით მასპინძელთა კარი აიღო და ანგარიში გაათანაბრა. ლივერპული ქულის მოპოვებასთან ახლოს იყო, თუმცა კომპენსირებული დროის ბოლო წუთზე ამინ ადლიმ გამარჯვების გოლი გაიტანა და ბორნმუთს 3 ქულა მოუტანა.

ამ მარცხით ლივერპულის 13-მატჩიანი წაუგებელი სერია დასრულდა, რომელიც 7 მოგებასა და 6 ფრეს ითვლიდა.

ამ მოგებით ბორნმუთს 30 ქულა დაუგროვდა და ცხრილში მე-13 ადგილზე იმყოფება, ლივერპული კი 36 ქულით მე-4 პოზიციას იკავებს და მანჩესტერ იუნაიტედს მხოლოდ 1 ქულით უსწრებს.