გერმანიის ნაკრების მთავარმა მწვრთნელმა, ნაგელსმანმა, მსოფლიო ჩემპიონატის განაცხადის გამოქვეყნებამდე მანუელ ნოიერის საერთაშორისო მომავალთან დაკავშირებით პირდაპირ პასუხს თავი განგებ აარიდა.
მიუხედავად იმისა, რომ ბაიერნის ლეგენდამ სანაკრებო კარიერა დაასრულა, ვრცელდება ინფორმაცია, რომ ის ჩრდილოეთ ამერიკაში დაგეგმილ მუნდიალზე გუნდის პირველი ნომერი იქნება.
ZDF-Sportstudio-ს ეთერში სტუმრობისას ნაგელსმანისგან ყველა სიტუაციის გარკვევას ელოდა, თუმცა მან 26-კაციანი საბოლოო შემადგენლობის დასახელება 21 მაისამდე გადადო და ნოიერზე კომენტარი არ გააკეთა. წარსულში მწვრთნელი ამბობდა, რომ ნოიერმა ნაკრები საკუთარი ნებით დატოვა და ამაზე მუდმივი დისკუსია უსარგებლო იყო, თუმცა ბოლო დღეებში მისმა დუმილმა ეჭვები კიდევ უფრო გაამძაფრა.
ნაგელსმანმა არც ის დაადასტურა, არის თუ არა 40 წლის მეკარე 55-კაციან გაფართოებულ სიაში:
ეს სია საჯარო არ არის, ამიტომ მასზე კომენტარს არ გავაკეთებ. შემიძლია მხოლოდ ის ვთქვა, რომ იქ ბევრი ფეხბურთელია. ჩვენი მოვალეობაა, შევაფასოთ ყველა ჯანმრთელი მოთამაშე, ვისაც გერმანიის პასპორტი აქვს. ამ სიაში არიან ისეთებიც, ვისაც ჩემი მწვრთნელობის დროს საერთოდ არ უთამაშია, მაგრამ ბუნდესლიგაში ან პრემიერ ლიგაში კარგი სეზონი ჰქონდათ
ამ თემაზე საკუთარი პოზიცია ბაიერნის მწვრთნელმა, ვინსენტ კომპანიმაც დააფიქსირა, რომელმაც აღნიშნა: „ჩვენ ნოიერის სახით საუკეთესო გერმანელი მეკარე გვყავს“. თუმცა, ბელგიელმა სპეციალისტმა იქვე დაამატა, რომ ნაგელსმანზე ზეწოლის მოხდენა არ სურს და მას მშვიდად მუშაობის საშუალებას აძლევს.
მეკარის პოზიციის გარდა, ნაგელსმანს სხვა საფიქრალიც აქვს, ის შემადგენლობის გაახალგაზრდავებას გეგმავს და განიხილავს ისეთი ტალანტების მიწვევას, როგორებიც ლენარტ კარლი და საიდ ელ მალა არიან, ხოლო ფელიქს ნმეჩასა და ნიკლას ფიულკრუგის ბედი უახლოეს დღეებში გადაწყდება.
