მანჩესტერ იუნაიტედის კაპიტანმა, ბრუნო ფერნანდეშმა, კლუბის ხელმძღვანელობასთან საკუთარი მომავლის შესახებ პირდაპირ ისაუბრა.
31 წლის ფლეიმეკერს მოქმედი კონტრაქტი 2027 წელს ეწურება და მის გასახანგრძლივებლად ის კონკრეტულ გარანტიებს ითხოვს, კერძოდ, გუნდი ყველა ტიტულისთვის ბრძოლაში უნდა დაბრუნდეს.
The Telegraph-თან ინტერვიუში ბრუნომ აღნიშნა, რომ ოლდ ტრაფორდზე მხოლოდ მონაწილეობისთვის ყოფნას არ აპირებს:
კლუბს ვუთხარი, რომ კონკურენცია მჭირდება. ვინც მანჩესტერ იუნაიტედში მოდის, ყველა ტიტულის მოგება სურს. არავინ ფიქრობს იმაზე, რომ ექვს წელიწადში მხოლოდ ერთი-ორი თასისთვის იბრძოლოს. თუ ვიბრძოლებ, მოგებასთან ახლოს ვიქნები, სხვა შემთხვევაში კი შანსი არ მაქვს.
ფერნანდეში იუნაიტედში 2020 წლიდან თამაშობს და ამ ხნის განმავლობაში მხოლოდ ორი ტიტული მოიგო, რაც მისი ამბიციების მქონე მოთამაშისთვის საკმარისი არ არის. განსაკუთრებით მტკივნეული პრემიერ ლიგის 13-წლიანი პაუზაა, რომელიც პორტუგალიელის თქმით, სასწრაფოდ გამოსასწორებელია.
შეუძლებელია შემპირდეთ, რომ პრემიერ ლიგას აუცილებლად მოვიგებთ, მაგრამ თუ მეტყვით, რომ კონკურენტუნარიანები ვიქნებით და ბოლომდე ვიბრძოლებთ, ეს ჩემთვის საკმარისია.
საინტერესოა მისი პოზიცია მაიკლ კერიკის შესახებ, რომლის ხელშიც გუნდმა 10-დან 7 მატჩი მოიგო. მიუხედავად იმისა, რომ ბევრი კერიკის მუდმივ მწვრთნელად დანიშვნას ითხოვს, ბრუნო ფრთხილობს:
მონაკვეთებში ნებისმიერი შეიძლება იყოს კარგი. მთელი სეზონის განმავლობაში სტაბილურობის შენარჩუნება გაცილებით რთულია. თუ სეზონს ისე დავასრულებთ, როგორც გვინდა, კარგი იქნება, მაგრამ ეს მაინც არ არის ის სრული სურათი, რომლის ნახვაც გვსურს.
როგორც ჩანს, კაპიტანი ხელმძღვანელობისგან უფრო მასშტაბურ გეგმას ელოდება, ვიდრე უბრალოდ დროებითი წარმატებული სერიაა.
