ჭადრაკი თუ ფეხბურთი: ჰალანდის ახალი გატაცება

ერლინგ ჰალანდი ჭადრაკში დიდ ინვესტიციას დებს: ნორვეგიელი ვარსკვლავის ახალი გატაცება.

მანჩესტერ სიტის თავდამსხმელმა, ერლინგ ჰალანდმა, ახალ გლობალურ საჭადრაკო ტურში ინვესტირების შესახებ გამოაცხადა. მისი მიზანი ამ ინტელექტუალური თამაშის პოპულარიზაცია და უფრო ფართო აუდიტორიამდე მიტანაა.

25 წლის ფორვარდი მხარს უჭერს ორგანიზაცია Norway Chess-ს, რომელიც მომავალი წლიდან მასშტაბურ პროექტს: Total Chess World Championship Tour-ს ჩაუყრის საფუძველს.

„ჭადრაკი საოცარი თამაშია. ის გონებას გიხსნის და ფეხბურთთან ბევრი საერთო აქვს. ორივე შემთხვევაში სწრაფად უნდა იფიქრო, ენდო ინსტინქტებს და რამდენიმე სვლით წინ გათვალო ყველაფერი. სტრატეგია და დაგეგმვა გადამწყვეტია“, - განაცხადა ჰალანდმა.

მან ასევე დასძინა: „ინვესტიციას იმიტომ ვაკეთებ, რომ მჯერა, ეს ახალი ტური ჭადრაკს მაყურებლისთვის კიდევ უფრო მიმზიდველ სპორტად აქცევს. Norway Chess-ის გუნდმა უკვე შთამბეჭდავი სამუშაო გასწია და ამ პროექტში ჩართვაზე უარს ვერ ვიტყოდი“.

ჰალანდი არ არის ერთადერთი ფეხბურთელი, რომელიც ჭადრაკითაა დაინტერესებული. მის გარდა ამ გატაცებით ცნობილნი არიან მოჰამედ სალაჰი, ტრენტ ალექსანდერ-არნოლდი და ებერეჩი ეზე. აღსანიშნავია, რომ ერლინგის თანამემამულე, მაგნუს კარლსენი, ჭადრაკის ისტორიაში ერთ-ერთ საუკეთესო მოთამაშედ მიიჩნევა.

ახალი ტური ყოველწლიურად ოთხ სხვადასხვა ქალაქში ჩატარდება. გამარჯვებული კი სამ დისციპლინაში გამოვლინდება: სწრაფი კლასიკური ჭადრაკი, რაპიდი და ბლიცი. ინიციატივას მხარს უჭერს ჭადრაკის საერთაშორისო ფედერაციაც.

„ისეთი მსოფლიო დონის ათლეტის გამოჩენა ჭადრაკში, როგორიც ერლინგ ჰალანდია, მძლავრი სიგნალია იმისა, თუ რამდენად დიდი კულტურული მნიშვნელობა აქვს ამ თამაშს დღეს“, - აღნიშნა FIDE-ს პრეზიდენტმა არკადი დვორკოვიჩმა.

საპილოტე ტურნირი მიმდინარე წლის შემოდგომაზეა დაგეგმილი. ყოველ სეზონზე საპრიზო ფონდი მინიმუმ 2.7 მილიონ დოლარს შეადგენს.