ჩავის მუნდიალზე ვნახავთ? - აფრიკულ ნაკრებთან მოლაპარაკებებს მართავს

ამსტერდამის აიაქსის ინტერესის შემდეგ, ჩავი ერნანდესი მაროკოს ეროვნული ნაკრების მთავარი მწვრთნელის პოსტზე განიხილება.

The Athletic-ის ინფორმაციით, ვალიდ რეგრაგი სულ მალე მაროკოელთა თავკაცის პოსტს დატოვებს, ფედერაციის ხელმძღვანელები კი მის შემცვლელს აქტიურად ეძებენ - ჩავისთან უკვე კონტაქტზე არიან და მოლაპარაკებების საწყისი ეტაპიც გამართეს.

ამ ეტაპზე, კონკრეტული მიმართულებებით პროგრესი არ არსებობს, თუმცა საქმეს ორივე მხარე სერიოზულად ეკიდება.

რეგრაგი ატლასის ლომებს 2022 აგვისტოდან წვრთნის - იმავე წლის მსოფლიო ჩემპიონატზე 1/2 ფინალში გაიყვანა (ისტორიაში პირველი აფრიკული ნაკრებია), დეკემბერ-იანვარში გამართულ აფრიკის ეროვნებათა თასზე კი ვიცე-ჩემპიონის სტატუსი მოაპოვებინა.

ადგილობრივი პრესის მიხედვით, აფრიკის თასის ფინალში მარცხის შემდეგ რეგრაგის მიმართ კრიტიკის დიდი ტალღებია. მისი ურთიერთობა ფედერაციის ხელმძღვანელობასთანაც უარყოფითისკენაა შეცვლილი.

მაროკოს ნაკრები მუნდიალის ფინალურ ეტაპზე მეშვიდედ ითამაშებს - ჯგუფურ ეტაპზე მეტოქეებად ბრაზილია, ჰაიტი და შოტლანდია ჰყავს.