ჩიმაევი კარიერის ყველაზე დიდ ჰონორარსა და წონის შეცვლაზე საუბრობს

ხამზატ ჩიმაევმა საშუალო წონაში ტიტულის დაცვის წინ თავისი სამომავლო გეგმების შესახებ ისაუბრა.

ჩიმაევის მწვრთნელმა აღნიშნა, რომ მან სთხოვა მებრძოლს, ამ ეტაპზე დაივიწყოს წონითი კატეგორიის შეცვლა და სრულად მოახდინოს კონცენტრაცია მომავალ დაპირისპირებაზე. ჩიმაევი ზედიზედ მეორედ გახდება ტურნირის მთავარი მოვლენის მონაწილე, როდესაც ამ უქმეებზე დაუმარცხებელ რეკორდსა და ჩემპიონის ქამარს შონ სტრიკლენდის წინააღმდეგ ბრძოლაში დადებს სასწორზე.

მიუხედავად იმისა, რომ წინ მნიშვნელოვანი შეხვედრაა, უკვე აქტიურად განიხილება ჩიმაევის შესაძლო ბრძოლა light heavyweight ტიტულისთვის. ამ დივიზიონში აქტიური ჩემპიონის ნაკლებობა, რაც კარლოს ულბერგის ტრავმითაა გამოწვეული, კიდევ უფრო რეალურს ხდის ხამზატის ამ გადაწყვეტილებას. მედიასთან საუბრისას, კითხვაზე, იქნება თუ არა 9 მაისის ორთაბრძოლა მისთვის ბოლო 185 ფუნტში, ჩიმაევმა უპასუხა: „იმედი მაქვს, რადგან პიცის ჭამა მიყვარს. ვნახოთ, რა მოხდება“.

კიდევ ერთი ფაქტორი, რაც საშუალო წონის დატოვებაზე მიანიშნებს, არის შესაბამისი მეტოქეების ნაკლებობა. მიუხედავად იმისა, რომ ნასურდინ იმავოვმა დაიმსახურა ტიტულზე ბრძოლა, UFC-მ არჩევანი შონ სტრიკლენდზე შეაჩერა, რადგან ეს „ქაღალდზე“ ბევრად მასშტაბური მოვლენაა.

ჩიმაევმა აღიარა, რომ სტრიკლენდის სკანდალურმა განცხადებებმა ბრძოლისადმი ინტერესი გაზარდა, რის გამოც ის 9 მაისს თავისი კარიერის ყველაზე დიდ ჰონორარს მიიღებს. „დიახ, აქამდე ამდენი ფული არასდროს მიშოვია, ეს კარგია“, - ღიმილით განაცხადა ჩემპიონმა.