ჩხუბის გამო დისკვალიფიკაციით დასაჯეს - ლუკა ზიდანი ალჟირის ნაკრებს გამოაკლდება

ნიგერიის ნაკრებთან მარცხის შემდეგ მომხდარი გაწევ-გამოწევის გამო, ალჟირელი ფეხბურთელები - ლუკა ზიდანი და რაფიკ ბელღალი დისკვალიფიკაციით დასაჯეს.

AFCON-ის ოფიციალური ვერდიქტის თანახმად, მეკარე ზიდანი აფრიკის თასის 2027 წლის გათამაშების საკვალიფიკაციო ეტაპის პირველ 2 შეხვედრას გამოტოვებს, ხოლო მარჯვენაფლანგელი ბელღალი გუნდს 4 თამაშით გამოაკლდება.

თავის მხრივ, უსაფრთხოების წესების დარღვევისა და მოთამაშეების, ოფიციალური პირებისა და გულშემატკივრების მხრიდან არასათანადო ქცევისთვის, ალჟირის ფეხბურთის ფედერაციას 100 000 აშშ დოლარის გადახდა მოუწევს. გასაჩივრებას არ აპირებენ.

ცნობისთვის, ნიგერიისა და ალჟირის 1/4 ფინალური მატჩის დასრულების შემდეგ, ალჟირელი ფანები მოედანზე შეჭრას ცდილობდნენ, ტრიბუნიდან კი ოფიციალურ პირებს კორუმპირებულებს ეძახდნენ და ფულის ბანკნოტებს უჩვენებდნენ.

ალჟირმა ნიგერიასთან პირველი ტაიმი ნულოვანი ფრით დაასრულა, მეორე ნახევარში კი, ოსიმენისა და ადამსის გოლების გამო, 0:2 დამარცხდა.