მსოფლიო ჩემპიონატის 1/16 ფინალურ ეტაპზე სენსაცია დაფიქსირდა.
პარაგვაის ნაკრებმა პენალტების სერიაში გერმანიას აჯობა და 1/8 ფინალში გავიდა, 4-გზის მსოფლიო ჩემპიონი კი ტურნირს ნაადრევად დაემშვიდობა.
შეხვედრა ძალიან დაძაბული და დრამატული გამოდგა. პირველი ტაიმი პარაგვაიმ დამსახურებულად მოიგო და მეორეში საკუთარი შედეგის დასაცავად გამოვიდა, ჰავერცმა მალევე შეძლო წონასწორობის აღდგენა.
ანგარიშის გათანაბრების შემდეგ, გერმანია უპირატესობას დაეუფლა და წინ გასვლის რამდენიმე შანსიც ჰქონდა, თუმცა პარაგვაელთა მეკარემ ყველა ჯერზე შეძლო ფავორიტის შეტევების განეიტრალება.
საქმე ექსტრა-ტაიმამდე მივიდა, სადაც ჯონათან ტამ მალევე შეძლო გოლის გატანა, თუმცა VAR-ზე ეპიზოდის გადამოწმების შემდეგ, მსაჯმა გოლი მეკარეზე დაჯარიმების გამო გაუუქმა.
საბოლოოდ კი გამარჯვებული პენალტების სერიამ გამოავლინა, სადაც გერმანიის მხრიდან დარტყმა ჰავერცმა, ვოლტემადემ და ტამ გააფუჭეს. თავდაპირველად პარაგვაიმ 2-ბურთიანი უპირატესობა გაანიავა, როცა გამარჯვებისათვის მხოლოდ ერთი ზუსტი დარტყმა სჭირდებოდა - სანაბრიამ ჯერ კარს ააცილა, შემდეგ კი ბალბუენას მანუელ ნოიერმა აუღო და თითქოს, გერმანია თამაშში დააბრუნა, თუმცა ტამ შემდეგივე დარტყმა გაუშვა ცაში და მესამე შანსი პარაგვაის ხელიდან აღარ გაუშვია.
შესაბამისად, პარაგვაი ტურნირის 1/8 ფინალში გავიდა, სადაც საფრანგეთსა და შვედეთს შორის გამარჯვებულს დაუპირისპირდება, გერმანიამ კი 2014 წლის მოგების შემდეგ ზედიზედ მესამედ ვერ შეძლო ტურნირის 1/8 ფინალში გასვლა.
