ძალაუფლებისთვის ბრძოლა რედ ბულში

იურგენ კლოპის რედ ბულის საფეხბურთო სტრუქტურაში გამოჩენას გერმანულ კლუბში პირველი სერიოზული მენეჯერული კრიზისი მოჰყვა.

გავრცელებული ინფორმაციით, ლაიფციგის სპორტული დირექტორი, მარსელ შეფერი თანამდებობის დატოვებას აპირებს. შიდა განხეთქილების მიზეზი მთავარი მწვრთნელის, ოლე ვერნერის გათავისუფლება გახდა, რაც კლოპის პირდაპირი მოთხოვნითა და ჩარევით მოხდა.

კორპორაციული გადაწყვეტილება სპორტული დირექტორის გვერდის ავლით

ლაიფციგმა ვერნერი და მისი ასისტენტები დაკავებული პოზიციებიდან მოულოდნელად გადააყენა, მიუხედავად იმისა, რომ მწვრთნელს კონტრაქტი 2027 წლამდე აკავშირებდა. Bild-ის ინფორმაციით, შეფერი 38 წლის სპეციალისტს აქტიურად იცავდა და ბოლო თვეებში მისი გაშვების მცდელობა ორჯერ დაბლოკა. თუმცა, საბოლოო გადაწყვეტილება სპორტული დირექტორის გვერდის ავლით, რედ ბულის სათავო ოფისში მიიღეს, სადაც კლოპმა, როგორც ფეხბურთის გლობალურმა ხელმძღვანელმა, გადამწყვეტი როლი ითამაშა.

Sky-ის ცნობით, კლუბში ვითარება უკიდურესად დაიძაბა. ამ ეტაპზე განიხილება სამი სცენარი: შეფერის გადადგომა, მისი გათავისუფლება ან ძველებურ რეჟიმში მუშაობის გაგრძელება, რაც ნაკლებად სავარაუდოა, რადგან დირექტორი მართვის ამგვარი ფორმით უკმაყოფილოა. ფინანსური თვალსაზრისითაც ლაიფციგს მძიმე ტვირთი აწვება - კონტრაქტის ცალმხრივად გაწყვეტის გამო კლუბს ვერნერისთვის 3 მილიონ ევროზე მეტის გადახდა მოუწევს.

კლოპის ორმაგი გამოწვევა მუნდიალის პარალელურად

შეფერის შესაძლო წასვლამ შესაძლოა საზაფხულო სატრანსფერო კამპანია სრულად ჩაშალოს. გერმანული მედიის (FAZ) ცნობით, სპორტულ დირექტორს უკვე უკავშირებენ აინტრახტ ფრანკფურტს, სადაც მას მარკუს კროშეს შემცვლელად მოიაზრებენ.

იურგენ კლოპს ამ კრიზისის მართვა საკმაოდ უცნაურ ვითარებაში უწევს, იგი ამჟამად მსოფლიო ჩემპიონატზე ტელეკომპანია Magenta-ს ექსპერტად მუშაობს და პარალელურად ლაიფციგისთვის ახალი, მორჩილი მწვრთნელის ძებნა უწევს, რომელმაც გუნდის შედეგები უნდა გააუმჯობესოს.