ენდი მარიმ კარიერა დაასრულა

პარიზის 2024 წლის ოლიმპიადაზე საჩოგბურთო ტურნირზე წყვილთა თანრიგში 1/4 ფინალური მატჩი შედგა, სადაც ერთმანეთს ამერიკული და ბრიტანული დუეტები დაუპირისპირდნენ.

ტეილორ ფრიცისა და ტომი პოლის წყვილმა 2 სეტში დაამარცხა (6-2, 6-4) დენიელ ევანსისა და ენდი მარის წყვილი.

შოტლანდიელი ჩოგბურთელი კი ამ მარცხით პარიზის ოლიმპიადასთან ერთად მთლიანად ჩოგბურთს დაემშვიდობა. ეს მისი პროფესიონალური კარიერის ბოლო მატჩი იყო. ენდი მარიმ ოლიმპიური თამაშების დაწყებამდე განაცხადა, რომ ის წყვილთა თანრიგში ითამაშებდა და შემდეგ კარიერას დაასრულებდა.

ბრიტანელმა კარიერაში 3 გრანდ სლემის მოგება მოახერხა - 2 უიმბლდონი და 1 ამერიკის ღია პირველობა.

სიმბოლურია, რომ მარიმ კარიერა სწორედ ოლიმპიადაზე დაასრულა, რადგან ის 2-გზის ოლიმპიური ჩემპიონია. შოტლანდიელმა ოქროს მედლის მოგება 2012 წელს ლონდონში და 2016 წელს რიოში შეძლო.

მარი პარიზულ კორტებს ცრემლებით დაემშვიდობა.