ენდრიკის ჰეთ-თრიქით ლიონმა ქართველების მეცი გაანადგურა

საფრანგეთის ლიგა 1-ის მე-19 ტურში ქართველების მეცმა საკუთარ მოედანზე ლიონი მიიღო.

მასპინძელთა მხრიდან სასტარტო შემადგენლობაში იყო გიორგი წიტაიშვილი, რომელმაც სრულად ითამაშა, გიორგი აბუაშვილი კი თამაშში 78-ე წუთზე ჩაერთო.

სტუმრებმა უპირატესობა პირველივე ტაიმში მოიპოვეს და მატჩის ბედიც მალევე გადაწყვიტეს. ანგარიში მე-11 წუთზე კორენტინ ტოლისოს პასის შემდეგ ლიონელთა ბრაზილიელმა ახალწვეულმა ენდრიკმა გახსნა. მე-16 წუთზე რუბენ კლუივერტმა სხვაობა ორამდე გაზარდა.

23-ე წუთზე ენდრიკმა კიდევ ერთი გოლი გაიტანა, თუმცა მცირე თამაშგარე მდგომარეობის გამო გოლი არ ჩაითვალა, 32-ე წუთზე კი ტაილერ მორტონმა ანგარიში 0-3 გახადა.

აქედან 2 წუთში მასპინძელთა მხრიდან კოფი კუაომ ერთი ბურთი გაქვითა, თუმცა ტაიმის კომპენსირებულ დროში მორტონის პასის შემდეგ, ენდრიკმა დუბლის შესრულება მაინც შეძლო და პირველი ტაიმის ანგარიში (1-4) დააფიქსირა.

64-ე წუთზე მეცმა კიდევ ერთი გოლი გაიტანა, ამჯერად თავი ჰაბიბუ დიალომ გამოიჩინა, თუმცა ქართველების გუნდმა თამაშში დაბრუნება მაინც ვერ შეძლო.

87-ე წუთზე შეცვლაზე შემოსულმა გიორგი აბუაშვილმა ენდრიკის წინააღმდეგ საჯარიმოში თამაშის წესები დაარღვია და პენალტი დაინიშნა, რომელიც ბრაზილიელმა ზუსტად დაარტყა და ჰეთ-თრიქიც შეასრულა.

ლიონმა მეცი 2-5 დაამარცხა და 36 ქულით ლიგა 1-ის ცხრილში მე-4 ადგილს იკავებს, წიტაიშვილისა და აბუაშვილის მეცი კი 12 ქულით ბოლო ადგილზეა და უსაფრთხო ზონას 8 ქულით ჩამორჩება.

რაც შეეხება ენდრიკს, რეალიდან იჯარით გადმოსულმა ბრაზილიელმა ოლიმპიკში ჩატარებულ 3 მატჩში უკვე 4 გოლი და 1 საგოლე გადაცემა მიითვალა.