ერთ ნაბიჯში ევროსთან - U21 ნაკრებმა ხორვატია დაამარცხა

2025 წლის ახალგაზრდული ევროპის ჩემპიონატის საკვალიფიკაციო ეტაპის პლეიოფის პირველ მატჩში საქართველოს 21-წლამდე ნაკრებმა თბილისში, მიხეილ მესხის სახელობის სტადიონზე ხორვატი თანატოლები მიიღო.

შეხვედრის ბედმა ერთმა გოლმა გადაწყვიტა. ანგარიში სწრაფი გოლით გაიხსნა. მე-4 წუთზე საჯარიმოში არეულობას მარკო სოლდოს ავტოგოლი მოყვა და ქართველები დაწინაურდნენ.

61-ე წუთზე ხორვატთა სიტუაცია კიდევ უფრო დამძიმდა. სტუმართა მეკარემ უხეში შეცდომა დაუშვა, რის შემდეგაც ქართველი მოთამაშის საჯარიმოს გარეთ წაქცევა მოუწია, ნიკოლა კავლინამ პირდაპირ წითელი ბარათი დაიმსახურა და თავისი გუნდი კაცნაკლული დატოვა.

რამაზ სვანაძის გუნდმა უპირატესობის ბოლომდე შენარჩუნება მოახერხა და მატჩი საქართველოს გამარჯვებით 1-0 დასრულდა. გუნდებს შორის განმეორებითი მატჩი ხორვატიის ქალაქ რიეკაში 19 ნოემბერს გაიმართება.

საქართველოს ახალგაზრდულ ნაკრებს ევროპის ჩემპიონატამდე ერთი ნაბიჯი აშორებს.