გურამ კაშიას სტატისტიკა საქართველოს ნაკრებში

გურამ კაშია სანაკრებო კარიერას ასრულებს.

რუმინეთთან ამხანაგური მატჩი საქართველოს ნაკრების კაპიტნისთვის ეროვნულ გუნდში ბოლო, 129-ე შეხვედრა იქნება.

კაშიას დებიუტი 2009 წლის პირველ აპრილს, მსოფლიო ჩემპიონატის საკვალიფიკაციო ეტაპზე, მონტენეგროს წინააღმდეგ მატჩში შედგა, რომელიც 0-0 დასრულდა.

დღემდე ჩატარებულ 128 მატჩში (რეკორდი საქართველოს ნაკრებში) კაშიამ 3 გოლის გატანა და 1 საგოლე გადაცემის შესრულება შეძლო, სულ 19 ყვითელი და 1 წითელი ბარათი მიიღო, ჯამში კი ნაკრების მაისურით 10,489 წუთი ითამაშა.

აღნიშნული 128 შეხვედრიდან გურამი 122 შემთხვევაში სასტარტო შემადგენლობაში იყო, 6-ჯერ კი თამაშში სათადარიგო სკამიდან ჩაერთო.

99-ჯერ კაშია ცენტრალური მცველი იყო, 16-ჯერ - საყრდენი ნახევარმცველი, 13-ჯერ კი მარჯვენა მცველად იყო გამწესებული.

გურამი ნაკრებს კაპიტნად პირველად 2013 წლის 6 თებერვალს, ალბანეთთან ამხანაგურ მატჩში გაუძღვა, 2021 წლიდან კი ის ეროვნული გუნდიდან ჯაბა კანკავას წასვლის შემდეგ მთავარი კაპიტანი გახდა.

ნაკრების მწვრთნელების მიხედვით გურამ კაშიას სტატისტიკა ასეთია:

ჰექტორ კუპერი - 4 მატჩი

თემურ ქეცბაია - 29 მატჩი, 1 გოლი

კახაბერ ცხადაძე - 10 მატჩი

ვლადიმირ ვაისი - 38 მატჩი, 1 გოლი, 1 საგოლე გადაცემა

რამაზ სვანაძე - 1 მატჩი

ვილი სანიოლი - 46 მატჩი, 1 გოლი

გურამმა ნაკრებში სადებიუტო გოლი 2012 წლის 12 ოქტომბერს, მსოფლიო ჩემპიონატის საკვალიფიკაციო ეტაპზე, ფინეთთან მატჩში გაიტანა, რომელიც 1-1 დასრულდა.

ეროვნულ გუნდში მეორე გოლი კაშიამ 6 წლის შემდეგ, 2018 წლის 1 ივნისს, მალტასთან ამხანაგურ შეხვედრაში გაიტანა, რომელიც საქართველოს ნაკრებმა სწორედ ამ გოლით მოიგო 0-1.

გურამის მესამე გოლი კი 2022 წლის 2 ივნისს, უეფას ერთა ლიგის C დივიზიონში, გიბრალტართან თამაშში ფიქსირდება, რომელიც საქართველომ 4-0 მოიგო.

და მთავარი მიღწევა - გურამ კაშია არის პირველი კაპიტანი, რომელმაც საქართველოს ნაკრები ევროპის ჩემპიონატზე გაიყვანა.

,,გული არაფერზე მწყდება" - კაშია ნაკრებში ბოლო მატჩის წინ