ერთ წელზე მეტი ხნის შემდეგ - NBA-ის ვარსკვლავები დაბრუნდნენ

ტაირის ჰალიბერტონს კალათბურთი 472 დღე არ ეთამაშა, დემიენ ლილარდს კი - 528 დღე.

ორივე კალათბურთელი ერთ წელზე მეტი ხნის პაუზის შემდეგ პირველად დაბრუნდა პარკეტზე NBA-ის წინასასეზონო მატჩებში.

ეს მნიშვნელოვანი მოვლენა რეგულარული სეზონის დაწყებამდე 2 კვირაზე ნაკლები ხნით ადრე მოხდა. NBA-ის ახალი სეზონი სამშაბათს, 20 ოქტომბერს დაიწყება.

26 წლის ტაირის ჰალიბერტონმა ინდიანა პეისერსის შემადგენლობაში მინესოტას წინააღმდეგ 16 წუთი ითამაშა და 7 ქულა მოაგროვა.

შეხვედრა ინდიანას გამარჯვებით, ანგარიშით 123:112 დასრულდა. აღსანიშნავია, რომ მატჩი იმ უნივერსიტეტის დარბაზში გაიმართა, სადაც ჰალიბერტონი სტუდენტობის პერიოდში თამაშობდა.

„472 დღე გავიდა მას შემდეგ, რაც ბოლოს კალათბურთი ვითამაშე. დაბრუნებისთვის ჩემს მეორე სახლზე უკეთეს ადგილს ვერ წარმოვიდგენდი.

აიოვას სახელმწიფო უნივერსიტეტს ჩემს გულში განსაკუთრებული ადგილი უკავია“, - განაცხადა გამთამაშებელმა მატჩის დაწყებამდე ჟურნალისტებთან საუბრისას.

ჰალიბერტონმა ბოლოს 2025 წლის NBA-ის ფინალური სერიის მე-7 მატჩში ითამაშა, რომელშიც ინდიანა ოკლაჰომასთან დამარცხდა. შეხვედრა მან შესანიშნავად დაიწყო და პირველ 7 წუთში 9 ქულა მოაგროვა, თუმცა აქილევსის მყესის გაწყვეტის გამო მოედნის დატოვება მოუწია.

ანალოგიური ტრავმა 2025 წლის პლეი-ოფში დემიენ ლილარდმაც მიიღო. ეს აღმოსავლეთ კონფერენციის პირველი რაუნდის სერიაში, სწორედ ინდიანა პეისერსის წინააღმდეგ მოხდა.

იმ პერიოდში ლილარდი მილუოკი ბაქსის ღირსებას იცავდა, თუმცა მოგვიანებით თავის ყოფილ გუნდს, პორტლენდ ტრეილ ბლეიზერსს დაუბრუნდა.

36 წლის გამთამაშებელმა გოლდენ სტეიტ უორიორსის წინააღმდეგ 19 წუთი ითამაშა და 15 ქულა მოაგროვა. პორტლენდმა შეხვედრა ანგარიშით 123:118 მოიგო.

ეს მატჩი ასევე საინტერესო იყო ლილარდისა და ჯა მორანტის ახალი დუეტის სანახავად. მორანტმა მოედანზე 19 წუთი გაატარა და 8 ქულა დააგროვა.

მორანტი პორტლენდში ივნისის ბოლოს გადავიდა. ბლეიზერსმა ის მემფის გრიზლისიდან ჯერემი გრანტისა და კრის მიურეის სანაცვლოდ დაიმატა.

ტრანსფერი მას შემდეგ განხორციელდა, რაც მორანტის მემფისში კარიერის ბოლო პერიოდი საკმაოდ რთული და დაძაბული აღმოჩნდა.