2026 წლის მსოფლიო ჩემპიონატზე ნიდერლანდების ნაკრებმა შვედეთი 5:1 გაანადგურა, მატჩის ერთ-ერთ მთავარ გმირად კი კოდი გაკპო მოგვევლინა.
ლივერპულის შემტევმა შეხვედრაში დუბლი და ასისტი მიითვალა, რითაც კიდევ ერთხელ დაამტკიცა, რომ ეროვნულ გუნდში სულ სხვა დონეზე თამაშობს. მუნდიალებზე მის აქტივში უკვე 7 მატჩში გატანილი 5 გოლია, საერთო ჯამში კი ნარინჯისფერი მაისურით 52 შეხვედრაში 23 გოლი დააგროვა.
მატჩის შემდეგ გაკპომ ღიად ისაუბრა იმ განსხვავებაზე, რაც კლუბსა და ნაკრებში მის თამაშს შორის არსებობს. მან აღნიშნა, რომ რონალდ კუმანის ტაქტიკაში გაცილებით მეტი თავისუფლება აქვს, ვიდრე მერსისაიდულ გუნდში, რის გამოც მოედანზე საკუთარი მაქსიმუმის ჩვენებას ახერხებს.
ნიდერლანდელთა შეტევას, რომელსაც ტურნირის წინ ბევრი სუსტ წერტილად მიიჩნევდა, შვედეთთან მატჩში სანდერლენდის ფორვარდი, ბრაიან ბრობიც დაეხმარა. მანაც ასევე დუბლი შეასრულა და მეტოქის დაცვას უდიდესი პრობლემები შეუქმნა.
გაკპომ ბრობის თამაში და ფიზიკური ძალა განსაკუთრებით შეაქო და აღნიშნა, რომ იაპონიასთან წინა ტურში ნათამაშები ფრის (2:2) შემდეგ, გუნდმა შეტევაში საჭირო ვარიაციულობასა და დინამიკას მიაღწია. კორექტირებულმა ტაქტიკამ კუმანის გუნდს სრული თავისუფლება მისცა და მუნდიალის ფავორიტებს სერიოზული სიგნალი გაუგზავნა.
