გიგზი იდეალურ მწვრთნელსა და სიტისთან დაწევაზე საუბრობს

რაიან გიგზი მომავალი მწვრთნელის პოსტზე მხოლოდ ერთ ადამიანს განიხილავს და აქვს ამბიცია, რომ იუნაიტედმა მეტოქე მანჩესტერ სიტისთან დაწევა შეძლოს.

გასულ სეზონში მანჩესტერ იუნაიტედმა პრემიერ ლიგაში მე-15 ადგილი დაიკავა და ჩანდა, რომ რუბენ ამორიმის ხელმძღვანელობა კლუბისთვის უკან გადადგმული ნაბიჯი აღმოჩნდა. მიუხედავად იმისა, რომ მიმდინარე სეზონში პროგრესი შეინიშნებოდა, ის აშკარად არ იყო შესაფერისი ფიგურა და თანამდებობიდან მაშინ გაათავისუფლეს, როცა კლუბი მეექვსე ადგილზე იმყოფებოდა.

დროებითი მწვრთნელის, მაიკლ კერიკის 10-მატჩიანი ხელმძღვანელობის შემდეგ, გუნდი ცხრილში მესამეა და მეხუთე ადგილზე მყოფ ლივერპულთან 6-ქულიანი უპირატესობა აქვს. კერიკმა ამ პერიოდში 7 მოგება და 2 ფრე მოიპოვა. მიუხედავად იმისა, რომ ჯერ გადაწყვეტილი არ არის, დარჩება თუ არა ის სეზონის შემდეგ, მისი ყოფილი თანაგუნდელი, რაიან გიგზი თვლის, რომ კლუბის წინსვლისთვის მასზე უკეთესი კანდიდატი არ არსებობს. გიგზი ასევე ამბობს, რომ გუნდს სიტისთან სხვაობის აღმოფხვრა შეუძლია.

მან განაცხადა:

მწვრთნელისთვის მსოფლიოში ყველაზე რთული თამაშების მოგებაა და ის ამას აკეთებს. ჩვენ მხოლოდ ერთი მატჩი წავაგეთ. გარდა ამისა, ატმოსფერო შეიცვალა. ადრე თამაშებს ისე ვუყურებდით, რომ არ ვიცოდით, რას მივიღებდით. ახლა ყველაფერი სხვაგვარადაა, ფანები მატჩებს იმ ფიქრით უყურებენ, რომ დიდი შანსი გვაქვს. ახლა ზევით ვიყურებით და არა ქვევით, შეგვიძლია სიტის დავეწიოთ.

ცვლილება საოცარია. ადრე ვფიქრობდი, რომ შვიდი-რვა ახალი მოთამაშე გვჭირდებოდა, ახლა კი ვთვლი, რომ ზაფხულში სამი-ოთხი ახალწვეულიც საკმარისი იქნება. ამ მომენტში მაიკლის გარდა სხვა კანდიდატს ვერ ვხედავ. ვფიქრობ, მან სიმშვიდე მოიტანა და მოიყვანს ისეთ ფეხბურთელებს, რომლებიც კლუბის სულს შეეფერებიან, რადგან თავად კარგად იცნობს აქაურობას. მიეცით მას დრო და ის კიდევ უფრო გაძლიერდება.

ამჟამად კლუბი 6 ქულით ჩამორჩება მეორე ადგილზე მყოფ სიტის, რომელსაც კრისტალ პალასთან გადადებული მატჩი აქვს ჩასატარებელი. სეზონის დასრულებამდე მხოლოდ შვიდი ტურია დარჩენილი და მიუხედავად იმისა, რომ სიტისთან გათანაბრება შესაძლებელია, მეტოქე ტიტულისთვის იბრძვის და ქულებს იოლად არ დათმობს.