„გოლი ჩასათვლელი იყო“, - კორღალიძე კოპენჰაგენთან მატჩის შემდეგ

იბერიას მთავარი მწვრთნელის, ლევან კორღალიძის კომენტარი კონფერენს ლიგაზე კოპენჰაგენთან მარცხის (1:2) შემდეგ.

იბერია 1999 კონფერენს ლიგის ძირითადი ეტაპის მესამე ტურში კოპენჰაგენს ესტუმრა და დაძაბულ შეხვედრაში 1:2 დამარცხდა. გამოცდილ მეტოქესთან თბილისურმა გუნდმა თამამად ითამაშა, საგოლე მომენტებიც შექმნა და დანიელებს გამარჯვება გაუჭირდათ.

მატჩის შემდეგ იბერიას მთავარმა მწვრთნელმა ლევან კორღალიძემ არჩათვლილი გოლის ეპიზოდი გამოყო. მისი თქმით, მსაჯების გადაწყვეტილებებზე ჩვეულებრივ არ საუბრობს, თუმცა ამჯერად იმედგაცრუება ვერ დამალა. კორღალიძის აზრით, გოლი უნდა ჩათვლილიყო.

„მსაჯზე კომენტარს იშვიათად კი არა, საერთოდ არ ვაკეთებ, მაგრამ დღეს არ შემიძლია პატარა კომენტარი არ გავაკეთო. ისეთი იმედგაცრუებულები ვართ... ვგულისხმობ არჩათვლილ გოლს, ჩვენი სუბიექტური აზრით, გოლი ჩასათვლელი იყო. რას ვიზამთ, ასე გადაწყდა.

მსაჯს არაფერს ვაბრალებ. თუ რამე ისე არ ხდება, როგორც გვსურს, ეს პირადად ჩემი ბრალია“, - თქვა კორღალიძემ.

მწვრთნელმა ფეხბურთელებს მადლობა გადაუხადა და გუნდის გამოსვლაზე პასუხისმგებლობა საკუთარ თავზე აიღო. ბოლოს კი, გულშემატკივრებსაც მიმართა:

„მინდა დიდი თხოვნით მივმართო გულშემატკივარს, მოვიდნენ სტადიონზე და მხარი დაგვიჭირონ. ყველაფერს გავაკეთებთ იმისთვის, რომ კმაყოფილები წავიდნენ“.