ინგლისის ნაკრების კაპიტნის, ჰარი კეინის თამაში ხუთშაბათს უემბლიზე უელსის წინააღმდეგ გასამართ ამხანაგურ მატჩში კითხვის ნიშნის ქვეშაა.
32 წლის თავდამსხმელს ტერფის მიკრო ტრავმა აქვს, რის გამოც ოთხშაბათს გუნდურ ვარჯიშში მონაწილეობა ვერ მიიღო და, ლევერკუზენის მცველ ჯარელ ქუანსასთან ერთად, ინდივიდუალურად დაიტვირთა.
ჰარი კეინს ინგლისის ნაკრების მაისურით ჩატარებულ 114 მატჩში 74 გოლი აქვს გატანილი და სამი ლომის ყველა დროის საუკეთესო ბომბარდირია - მე-2 ადგილოსან უეინ რუნის 21 გოლით უსწრებს.
ინგლისელი ფორვარდი მიმდინარე სეზონში ფანტასტიკურ ფორმაშია - ყველა საკლუბო ტურნირის ეგიდით ჩატარებულ 9 მატჩში 17 გოლი და 3 ასისტი აქვს.
უელსის შემდეგ, ინგლისს 14 ოქტომბერს, ლატვიასთან მსოფლიო ჩემპიონატის შესარჩევი ეტაპის გასვლითი მატჩი აქვს. ტომას ტუხელის გუნდი მუნდიალის საგზურს გაინაღდებს იმ შემთხვევაში, თუ გაიმარჯვებს, მისი კონკურენტი სერბეთი კი შაბათს ალბანეთთან ქულებს დაკარგავს.
