დუეინ ჯონსონმა, ადამ სენდლერმა და სხვა ვარსკვლავებმა თეთრ სახლში UFC-ის ღონისძიებაზე დასწრებაზე უარი თქვეს.
წლის ერთ-ერთი ყველაზე მასშტაბური სპორტული მოვლენა მომავალ კვირას, 14 ივნისს გაიმართება, სადაც მთავარი ბრძოლა ილია თოფურიასა და ალექს პერეირას მონაწილეობითაა ჩანიშნული.
ოქტაგონის გარშემო ტრიბუნები ფანების ნაცვლად სელებრითებით, გავლენიანი პოლიტიკოსებითა და სამხედროებით შეივსება. UFC-ის პრეზიდენტმა, დანა უაითმა, განაცხადა, რომ მას, პრეზიდენტ დონალდ ტრამპსა და კომპანია TKO-ს ხელმძღვანელს, არი ემანუელს, სტუმრების სიის შესადგენად კვოტები ჰქონდათ გამოყოფილი.
უაითმა საკუთარი 300-კაციანი სიიდან მოწვევა უამრავ ვარსკვლავს გაუგზავნა, მათ შორის დუეინ ჯონსონს, რომელიც წარსულში ხშირად ესწრებოდა ორგანიზაციის ღონისძიებებს და TKO-ს დირექტორთა საბჭოს წევრიცაა.
გამოცემა Vanity Fair-ის ინფორმაციით, ჯონსონთან ერთად მოწვევაზე უარი თქვეს ადამ სენდლერმა, ჯარედ ლეტომ და მარიო ლოპესმაც. ამის საპასუხოდ უაითმა Forbes-თან ინტერვიუში აღნიშნა:
როცა მხოლოდ 300 ბილეთი გაქვს, ბევრი სელებრითის მიწვევას აზრი არ აქვს. ჩემს სიაში ცნობილი ადამიანების მხოლოდ მცირე ჯგუფია. მე მირჩევნია იქ ნამდვილი ფანები იყვნენ, რომლებიც ამ ყველაფერს დააფასებენ.
ამავდროულად, გავრცელებული ინფორმაციით, მოწვეულ სტუმრებს შორის არიან რეჟისორი გაი რიჩი და ამერიკული ფეხბურთის ლეგენდა ტომ ბრეიდი, რომლებიც ტურნირს სავარაუდოდ დაესწრებიან.
