იამალის ნომერი აიღო — ბარსელონამ ბარდჯი პირველი გუნდის ფეხბურთელად დაარეგისტრირა

ბარსელონამ რუნი ბარდჯი პირველი გუნდის ფეხბურთელად ოფიციალურად დაარეგისტრირა.

აქამდე ის ოფიციალურად ბარსელონა B-ს მოთამაშედ ირიცხებოდა. ფინანსური ფეარ-პლეის მოთხოვნების გამო კატალონიელებს ფეხბურთელი მეორე გუნდში ჰყავდათ დარეგისტრირებული. 20 წლის შვედი 28-ე ნომრით თამაშობდა.

კვირას, ესპანეთის სუპერთასის ფინალიდან დაწყებული, ბარდჯი ჩაითვლება ბარსელონას პირველი გუნდის წევრად და განაცხადში 19 ნომრით იქნება.

20 წლის ფეხბურთელი ბარსელონამ კოპენჰაგენიდან გასულ ზაფხულს 2.5 მილიონ ევროდ დაიმატა. მიმდინარე სეზონში ბარდჯიმ 14 მატჩში 2 გოლი და 4 საგოლე გადაცემა მიითვალა. 

19-ნომრიანი მაისურით გასულ სეზონში ბარსელონაში ლამინ იამალი თამაშობდა, რომლის 10-ანზე გადასვლის შემდეგაც ნომერი ვაკანტური იყო.